Hpakant Ginra Hta Masha Gap Sat Hkrum Ai Mahkang Ni Byin Law Nga Ai Lam

Pajau Media

February 20, 2026

Mung Masa grai shuk shanut nga ai Hpakant ginra hta Lagu lagut manghkang sha n-ga Masha sat hkrum ai manghkang ni jahkring hkring byin nga ai hte February 20 ya jahpawt daw hta mung Hpakant Yu Ma U ru hka makau kaw sinat gap da ai hkang hte Masha langai si taw ai Moi mang mu ai lam chye lu ai.

Asak si sum ai wa gaw (30) ning grup yin re ai hte Baw kaw Sinat gap da ai Ningma sha n-ga Lata lahkawng maga gyit da hkrum ai hkang ni mung mu ai lam, asak si sum ai wa gaw kadai gara kaw na re ngu hpe gaw n chye lu ai re.

Hpakant ginra hta hpyen masa grai shuk shanut wa ai hpang Laknak lang Uhpung lahkawng maga shamu shamawt nga dingyang re ai hta ya na zawn re Masha gap sat manghkang ni mung jahkring hkring byin ai rai nna kadai gara Uhpung ni galaw ai ngu hpe gaw n chye lu ai re .

Mung masa n pyaw ai hpe ahkaw ahkang la nna lagu lagut manghkang ni mung byin law nga ai hte hpyen majan a majaw gan yen kau da ai Mashi kahtawng masha ni dum nta hkan na arung arai ni mung lagu hkrum ai lam ni byin nga ai re hpe mung chye lu ai.

Gasat gala hpyen masa gaw grai shaja hkat nga ai re hte Myen hpyen dap kawn mung laknak kaba gap shadam ai lam dingyang galaw nga ai majaw Mung masha asak si sum, hkala hkrum ai lam shani shagu ngu na byin nga ai re hpe mung chye lu ai.

Shiga – Pyilan U