Hpakant Ginra Hta Myen Hpyen Dap Hpyen Grau Shamu wa ai Lam

Pajau Media

November. 11.2025

Myen hpyen dap gaw Hpakant ginra kata November 9 ya kaw nna hpyen shamu ai lam bai galaw wa ai rai nna KIA pawng hpawm hpung ni mung laja lana ninghkap gasat nga ai lam chye lu ai.

Myen hpyen dap hpung ni ga Lawa Mare kaw na Hpakant Maw Si Zar hte Lawng Hkang ginra de laja lana Hpyen n-gun htu shadut nna htim gasat wa ai majaw Mung masha 2 asak ai sum ai rai nna kaga hkra hkala hkrum ai mung nga ai re hpe chye lu ai.

Dai sha n-ga Hpakant Tatma Kawng kaw nna Mung Masha ni nga ai de Laknak kaba gap garum nga ai re hpe mung chye lu ai.

November 10 ya shani hta mung Lawng Hkang Mare maga de Myen hpyen dap hte KIA pawng hpawm hpung ni lapran gasat gala byin ai zawn Maw Si Zar Hpung Gyi Jawng, Golf Pa, Myauk Kung hte Lay Pin makau shara ni hkan du hkra sinat n sen matut manoi na nga ai lam ginra masha ni tsun ai re.

Dai sha n-ga shana maga Hkying 1:25 PM aten daram hta mung Myitkyina kaw na lung wa ai Jet Fighter langai gaw Masat 26 Dap dung maga de bawm wa jahkrat ai lam chye lu ai.

Hpakant Ginra hta Myen hpyen dap gaw Ra lata poi a matu ginra madu lu hkra hpyen n-gun htu shadut ai lam grau galaw wa ai majaw KIA pawng hpawm hpung ni hte gasat gala majan jahkring hkring byin nga ai re.

Shiga- Htu Seng