Hpakant Ginra Hta Myen Hpyen Dap Laknak Kaba Gap Ai Majaw Mung Masha Asak Si Sum Hkala Ai Lam Shani Shagu Byin Nga

Pajau Media

6 August, 2025

Ya aten gasat gala majan laja nga ai Hpakant Seng Tawng Yu Ma mare maga na Si Pin Koi Tit (စည်ပင်ကွက်သစ်ဧရိယာ) mayan kaw July 5 ya shana daw HKying 7: 30 PM aten daram hta Hpakant Pyuha Kawng kaw nna Lak Nak kaba gap bun ai majaw Mung masha si hkala hkrum ai lam ginra masha ni tsun ai.

Lak Nak wa hkrat kapaw ai lam hte seng nna tsun ai hta “Yu Ma Si Pin shingdu maga na Daw Pu chyoi a gat seng shawng kaw wa hkrat nna kapaw ai kaw masha grai law hkra mat ai, langai gaw Kan Pu she ayai na si mat ai, dum nta ni mung yawng hkra ai re” nga nna tsun ai re.

Hpakant Pyuha kawng kaw nna Myen hpeyn dap hpung ni gaw Mung masha ni nga ai de Lak Nak kaba gap bun ai lam dingyang galaw ai majaw Yu Ma mare na dum nta makau kaw wa hkrat kapaw nna Mung masha marai (2) asak si sum nna yawm htum marai (15) hkala sawng ai lam chye lu ai.

Dai shani shana daw hkying 6:40 PM aten daram hta mung Sharaw Hka mare mayan na Mung masha dum nta langai kaw mung Drone bawm wa hkrat ai majaw la langai asak si sum ai lam mung chye lu ai.

Hpakant ginra masa hpe Mung masha langai matut tsun dan ai hta “ dai shana daw hta mung Hpakant Pyuha Kawng kaw nna Lak Nak kaba gap dingyang re majaw shawng shani na zawn Mung masha dum nta ntsa kaw wa hkrat na mung grai tsang ai, kaja nan masha law law si ai ni gaw si, hkala ai ni gaw hkala hte grai myit n pyaw ai ” nga nna myit yawn let tsun dan ai re.

Dai sha n-ga August 3 ya shani hta mung San Joi mare hta Lak Nak kaba wa hkrat kapaw ai majaw hkala hkrum ai ni kaw na asak (88) ning re ai Daw Nyu Seing gaw August 5 ya jahpawt daw hta tsi tsi hkam la nga dingyang kaw asak si sum ai lam mung chye lu ai. Hpakant ginra hta gasat gala majan masa grai shaja hkat ai majaw Hpakant Pyuha kawng kaw nna Mung masha ni nga ai de Lak Nak kaba gap bang nga dingyang re.

Shiga- ND