Hpakant Ginra Hta Myi Hprap Wan Lawan Lu Na Matu Mung Masha Ni Ra Sharawng Nga Ai Lam

Pajau Media

August 21, 2025

Jinghpaw mung Hpakant ginra hta myi hprap wan nlu mat ai shata (3) daram na wa sai hte lam shagu grai yak hkak dut dang wa ai nna myi hprap wan lawan lu na hpe mung masha ni ra sharawng nga ma ai re.

Myi hprap wan n lu ai majaw ginra mung masha ni a Phone, Power Bank ni sha n-ga myi hprap wan hte seng nna lang ra ai rai ni yawng hpe wan jak jasu nna sha galaw ra ai lam ginra masha langai tsun ai re.

“ Wan n sa ai grai na sai, ya aten jak sau ni mung manu grai rawt taw ai, ngut na Solar mung marang htu ai aten re majaw n hkak ai” nga nna ginra masha tsun ai re.

Hpakant ginra hta ya aten hpyen masa grai shaja hkat ai sha n-ga shimlum lam myit tsang ra nga ai aten myit hprap wan mung n lu re ai majaw lam shagu grai yak nga ai re hte lit nga ai ni kawn myi hprap wan lu na matu lawan galaw ya na hpe ra sharawng nga ma ai re.

Jak Sau manu rawt ai sha n-ga, lu yak taw nga ai masa re majaw jak sau hte lang nga ai ni mung grai yak hkak nga ai lam chye lu ai.

Ya aten gasat gala majan gaw Hpakant lam mayan hta byin nga ai re majaw hkawm sa hkawm wa lam lapran sau mawdaw ni mung chyat nga ai lam mawdaw la ni tsun ai kaw na chye lu ai.

Ka mai, Nam Ya, Hpakant lam mayan hta Myen Hpyen dap shara la da ai majaw hkrun lam hkawm ntsa jep joi ai lam laja lana galaw nga ai, Ma U Pin lahta Chyauk Htu, Nam ya, Nam Ting, Yam shadu Jak Rung, Lay Pin shagyit ni hta mung mying, mung chying masat ni hpe laja lana jep joi nga ai lam chye lu ai.

Shiga- Hpring