Myen Hpyen Dap A Sut Hpaga Hte Shiga Shabra Ai Ganghkau Shi Laika Man 270 Hpe Fecebook Kaw Nna Dawm Jahkring Kau Ai Lam

Pajau Media

28 January 2026

Facebook Meta kaw nna Myen Hpyen Dap madu ai sut hpaga magam bungli hte ganghkau shi laika man 270 daram hpe Facebook company kaw nna dawm jahkring kau ai lam Justice for myanmar kawn ndau da ai re.

Ya na zawn dawm jahkring kau ai law malawng gaw Mytel kawn shapraw ai gunrai ni, service galaw ya ai shi laika man ni re lam, Myen Hpyen Dap a sut hpaga magam bungli law malawng Myanmar Economic Corporation (MEC) hte Myanmar Economic Holdings Litmited (MEHL) magam bungli, dazik hte gindun ai ni re hpe mung chye lu ai.

Telecom Network MECtel , Inwa Bank hte Myawaddy Bank, Sinmin Pyilat , Myanmar Beer, Dagon Dazik ni, Nan Myai Café hte Indoor Skydiving hte gindun ai Accout ni mung lawm ai re hpe chye lu ai.

Facebook company gaw Myen hpyen dap a ganghkau shi laika man ni rai nga ai light for justice 3 , News Service Station hte Myanmar Information Community ni mung dawm jahkring kau ai re hpe mung chye lu ai.

Dai Accout ni gaw Myen Hpyen Dap gumshem ai lai ladat ni hpe mara amu kaw nna lawt na matu garum madi shadaw lam ni a majaw re lam chye lu ai. Facebook kawn ya na zawn galaw ai gaw 2021 shaning kaw nna Myen Hpyen Dap a sut hpaga bungli hte media ni hpe hkum pat kau na ngu ai policy hte maren galaw ai re lam mung chye lu ai.

Alphabet , Apple, TikTok hte Telegram Company ni hku nna mung hpyen tara tawt lai nna mung masha a ntsa tawt lai ai mara amu kaw nna lawt hkra Myen Hpyen Dap hpe madi shadaw ai shi laika man ni, sut hpaga bungli ni hpe matut hkum pat ai lam galaw na matu Justice for Myanmar kaw nna hpyi shawn da ai re.

Shiga- Htu Seng