Hpakant Ginra Kata Myen Hpyen Laknak A Majaw Mung Masha Si Hkala Ai Lam Shani Shagu Ngu Na Ram Byin Nga

Pajau Media

February 11, 2026

Ya aten Jinghpaw mung kata gasat gala majan laja dingyang rai nga ai re hte Myen hpyen dap kawn laknak kaba gap shadam ai lam, Drone bawm, nbungli bawm ni a majaw mung masha si hkala hkrum ai lam shani shagu byin nga ai re lam chye lu ai.

Hpyen laknak kaba, hkam bawm ni a majaw mara kata Mung masha ni hkala hkrum ai lam shani shagu nga ai hta February 10 ya shani hkying 1 grup yin hta mung Lawng Hkang, Mawsi Zar lam maw kaw kadai gara uhpung ni hkam da ai re n chye ai hkam bawm a majaw San Chyoi mare kaw nna amyu shayi 2 hte Sik Mu kaw na la marai langai hkala ai lam chye lu ai.

Dai sha n-ga Hpakant Mashi Kahtawng maga de mung shani shagu nbungli bawm wa jahkrat ai lam nga ai re hte shani shagu hpyen masa grai shaja hkat nga ai masa re hpe mung chye lu ai.

Hpakant ginra kata lai wa sai Januray hpang jahtum bat kaw nna February bat lahkawng ngu na aten laman lak nak kaba, hkam bawm hte hpyen laknak ni a majaw asak si sum ai Mung masha marai 5 nga nna hkala hkrum ai gaw marai 20 du hkra nga ai lam ginra shiga ni kaw na chye lu ai.

Dai sha n-ga Myitkyina-Hpakant lam mayan mare kahtawng hkan mung myen hpyen dap shara la shamu shamawt nga ai sha n-ga hpyen dap shara jahkrat ai shara hkan shimlam grai shagreng wa ai lam, Hpakant lam mayan na Mung masha ni gaw tinang mare buga de du sat yam nga, hkau na ni wa gawan na mayu tim hpyen masa grai naw tsang ra ai majaw n gwi wa shi ai lam mung chye lu ai.

Shiga – Pyilan U