Ra Lata Poi Gaw Myen Hpyen Dap A Matu Ntara Ai Lam Grau Galaw Lu Hkra Lam Hpaw Ya Ai Lam Langai Re Nga Nna Uhpung Uhpawng Ni Tsun Dinglun Ai Lam

Pajau media

February 12, 2026

Myen hpyen dap woi galaw ai Ra lata poi hte seng nna Rawt Malan Wuhpung Wuhpawng ni ninghkap ai sha n-ga Myen mung Amyu shayi Wuhpung Wuhpawng ni mung Ra lata poi gaw Myen hpyen dap hpe n tara ai magam bungli grau lu galaw hkra Lam hpaw ya ai mahkrun langai re nga nna tsun dinglun nga ma ai re.

Myen hpyen dap gaw Ra lata poi galaw nna Tara shang ai asuya tai hkra shakut nga ai raitim Myen mungdan ting madang hku nna htu shadut htim gasat majan grau laja ai sha n-ga shinggyim ahkaw ahkang tawt lai ai lam ni mung matut manoi galaw nga ai re nga nna အမျိုးသမီးများအဖွဲ့ချုပ် (မြန်မာနိုင်ငံ) – WLB kawn tsun dinglun da ai re hpe mung chye lu ai.

WLB kawn tsun da ai hta Myen hpyen dap gaw Amyu shayi ahkaw ahkang hte seng nna shanglawm ai ni hpe rim ahkyak la ai lam grau galaw wa ai, hkawm sa hkawm wa lam hta jep joi ai lam grau galaw wa ai, mara kata mung masha ni hpe rim zingri sat ai lam, amyu shamyit dingsa gasat ai lam ni matut manoi tawt lai nga ai lam tsun da ai re .

Lai wa sai 2025 laning mi laman hta mung mazut roi rip ai lam, Num la garan ginhka ai masa lam ( Gender ) hte seng nna tawt lai ai mara amu yawng rai yang 209 lang byin lai wa sai hte ndai zawn re ai manghkang kaw nna lawt wa ai amyu shayi marai 1,212 du hkra nga ai lam tsun da ai re.

Myen hpyen dap gaw ya na zawn amyu shayi ni a ntsa tawt lai ai mara amu hte seng nna mara lawt taw ai masa n byin hkra hte mung masa lam yan ninggam shagu hta amyu shayi ni shang lawm lu ai lam a matu mung WLB hpyi shawn da ai re hpe mung chye lu ai.

Dai sha n-ga Mungkan mungdan kawn mung Myen hpyen dap hpe madi shadaw ai lam ni dan di kau na matu mung ahkyak ai lam, nrai yang Mung masha ni grau grau sawng ai masa hte hkrum katut wa mai ai lam WLB kawn tsun da ai hpe shiga hta tang madun da ai kaw na chye lu ai.

Shiga – Pyilan U