Hpakant Ginra Kaw Shani Shagu Nbungli Bawm Jahkrat Ai Majaw Mung Masha Asak Si Sum Ai Lam Byin Nga

Pajau Media

February 12, 2026

Jinghpaw Mung Hpakant ginra hta gasat gala majan matut manoi byin nga ai rai nna Myen hpyen dap kawn nbungli bawm shani shagu jahkrat bun ai majaw ginra mung masha asak si sum ai lam byin nga dingyang re lam chye lu ai.

“ Myen hpyen dap a nbungli, laknak kaba ni hte gap gasat ai majaw shani shagu ngu na mung masha hkra hkala ai lam ni nga ai re, asak si sum ai mung nga ai ” nga nna ginra masha ni tsun ai re.

Myen hpyen dap kawn nbungli htim gasat ai lam matut manoi galaw nga ai majaw ginra mung masha ni grai sadi nna hkawm sa nga ra ai lam, Nbungli hkawm yang lam maw de pru nna yu ai lam ni n galaw na matu tsun sadi jaw da ai re hpe mung chye lu ai.

Hpakant majan hta lai wa sai January 24 ya shani kaw nna hpang nna htim gasat majan bai laja wa ai rai nna Myen hpyen dap a Hk.M.Y 381 Dap hte KIA pawng hpawm hpung ni ang katut gasat gala byin ai lam nga ai zawn Myen hpyen dap maga na masing nga nga hte nbungli, drone, laknak kaba gap bang ai lam galaw nga ai re hpe mung chye lu ai.

Ya aten Jinghpaw Mung Hpakant Muklum kaw gasat gala majan laja nga ai sha n-ga Waimaw, Manmaw hte ginra n kau kaw mung hpyen masa grai shaja hkat nga dingyang re lam chye lu ai.

Shiga- Hpring