Hpakant Ginra Kata Ra Lata Poi Ninghkap Shamu Shamawt Lam Galaw Nga

Pajau Media

December 9, 2025

Jinghpaw Mung Hpakant ginra hta ra lata poi ninghkap lamang hpe December 8 ya shani Hpakant ginra masha ni galaw ai lam chye lu ai.

Dai ninghkap shamu shamawt lamang hta Myen hpyen dap woi awn galaw na ra lata poi hpe ninghkap ai hku na Myen mungdan ting hta du wa na December 10 ya shani nsen n shapraw zim re ai masa hku nna ninghkap ai lamang hta mung masha yawng shang lawm na matu myit sharawt ai lam hpe Hpakant Lawng Hkang ninghkap lamang lit la da ai hpung ni kawn tsun n dau ai lam ni galaw ai re hpe chye lu ai

Hpakant ginra kaw nga ai ninghkap lamang lit la da ai hpung ni gaw n tara ai hku galaw hkyen nga ai ra lata poi hpe ninghkap ai lam, sticker hkan shakap ai lam, Hpakant ginra mung masha ni hpe ninghkap laika pa garan ai lam ni galaw ai re hpe chye lu ai.

Myen hpyen dap gaw Jinghpaw mung kata ra lata poi galaw na matu Hpakant ginra sha n-ga Waimaw Lamyang Putao hte Manmaw ginra ni de nbungli bawm laja lana htu shadut majan laja nga ai re hpe chye lu ai.

Shiga- Hpring