Kamai Ginra Kata De Myen Hpyen Dap Hpyen N-Gun Htu Shadut Wa Ai Majaw Mung Masha 200 Hkawt Hprawng Yen Wa Ai Lam

Pajau Media

December 9, 2025

Hpakant lam Ka Mai, Deng 8 ginra de myen hpyen dap hpyen n-gun kaba hte htu shadut shang wa ai majaw KIA pawng hpawm ni hte gasat gala majan laja lana byin ai lam chye lu ai.

Myen hpyen dap gaw Ka Mai ginra de December 6 ya kaw nna hpyen n-gun kaba htu shadut wa ai majaw KIA pawng hpawm hpung ni hkap shingla gasat ai kawn gasat gala majan laja wa ai re hte dai ginra na mung masha 200 grup yin gaw ni nawn ai Yi Sun Hkauna hkan hte tinang shim dum ai shara hkan koi yen hkawm ai lam chye lu ai.

Myen hpyen dap gaw mungdan kata Ra lata poi galaw na matu shawa myit gang shamu shamawt lamang ni galaw nga ai aten raitim maga mi de gaw gasat gala lam hpe jahkring ai lam n nga matut manoi shaja wa ai gaw ra lata poi galaw na shara maden masing galaw ai re nga nna ginra masha ni tsun maram nga ma ai re.

Jinghpaw Mung kata Hpakant, Manmaw, Waimaw ginra gasat gala majan gaw grau grau laja nga ai re hte gasat gala majan gaw bat mi laman 15 lang byin ai lam chye lu ai. Laknak kaba, drone, Nbungli bawm ni shani shagu gap gasat ai majaw mung masha si hkala hkrum ai lam law nga ai re hpe chye lu ai.

Shiga -Pyilan U