November Shata Laman Amyu Shayi Marai 51 Asak Si Sum Ai Lam

Pajau Media

December 9, 2025

Myen mungdan ting madang hku November shata laman amyu shayi marai 51 asak si sum ai lam Myen mungdan amyu shayi hpung BWU kawn ndau da ai re hpe chye lu ai.

Asak si sum ai lam hta Myen hpyen dap a Nbungli, Laknak kaba gap hkrum ai lam, n tara ai hku zingri sat hkrum ai lam, hkam bawm a majaw hte gasat gala majan sha n-ga mazut roi rip manghkang ni, htawng kata zingri ai lam ni mung lawm ai lam ndau da ai re.

Asak si sum ai marai 51 kaw marai 6 gaw asak 18 ning n pu na amyu shayi ni rai nna, marai 57 gaw hkala hkrum ai lam chye lu ai. Jinghpaw mung hta mung amyu shayi marai 3 asak si sum ai lam, Rahkai mung kaw na marai 16 hte amyu shayi asak si sum law dik mungdaw rai nna Sagaing ginra kaw na marai 10 hte Mandalay ginra kaw na marai 9 lawm ai lam chye lu ai.

November shata laman laklai ai mabyin gaw November 4 ya shani Tan Tawng Gyi ginra kata hta Myen hpyen dap a ဘုရင့်နောင် wunkat kaw na hpyen ma ni hte 124 Dap kaw na hpyen ma ni gaw Zanay Kung mare kaw na asak 18 ning re ai amyu shayi langai hpe Myen hpyen la marai 3 kawn mazut roi rip sat zingri ai mabyin hte November 7 ya shani Rahkai mung Pung Na Jun ginra Awng Phyu Pin mare hte ယိုးတရုပ်ကျေးရွာ mare de Nbungli bawm wa gap gasat ai majaw amyu shayi marai 4 asak si sum ai lam nga sai re hpe chye lu ai.

Shiga – Htu Seng