Hpakant Ginra Kaw Myen Hpyen Dap Gaw Hpyen Palawng N hpun Ai Sha Shinggan Bu Hpun Palawng Hpun Nna Shamu Shamawt Nga Ai Lam

Pajau Media

November 3, 2025

Myen hpyen dap gaw November 1 ya kaw nna ginra kata hpyen hkying n hpun ai sha shinggan bu hpun palawng ni hpun nna hpyen shamu hkawm nga ai lam Hpakant ginra masha ni tsun ai kaw na chye lu ai.

Lai wa sai October 31 ya shana daw Hpakant Yu Ma Maga de Laknak kaba gap shadam ai hpang November praw 1 jahpawt jau kaw nna shinggan bu hpun palawng ni hpun nna hpyen shamu shamawt nga ai lam chye lu ai.

Shinggan bu hpun palawng hpun da ai hpyen la ni gaw shada da lata a htawk nna sha kumla madun shamu shamawt nga ai re majaw grai sadi maja ra ai lam, Hpakant ginra kata shamu shamawt nga ai hta SNA Sam hkyeng ni mung lawm ai lam chye lu ai.

Ya aten Hpakant Ginra Byuha Kawng, Lawng Hkang Yam shadu jak rung, Mawwan Kaji, Mawwan Kaba, Maw Maw Layang, Maw Si Zar, Tawng Pyo, Sharaw Hka, Maw Tawng, San Chyoi mare ni hkan dap shara jahkrat nga ai re lam chye lu ai.

June shata htum maga kaw nna Hpakant ginra de myen hpyen dap shamu shamawt shang wa ai rai nna Nbungli Bawm, Laknak kaba gap ai majaw Mung masha marai 100 hkawt asak si sum sai lam Hpakant ginra shinggyim nau na garaum hpung ni tsun da ai re.

Hpakant Tatma Kawng, Mashi Kahtawng Rahkai Kawng Myen hpyen dap shara kaw nna lai wa sai October 31 ya shana hkying 9 aten daram hta Laknak kaba gap shadam ai majaw Yu Ma Seing Lin Company wang de Laknak kaba wa hkrat kapaw ai majaw Mung masha dum n ta n kau hten ai lam nga sai re.

Shiga - Htu Seng