Hpakant Ginra Lam Hpaw Sai Nga Tim Tsi Mawan Arai Hte Gunrai N Kau Htaw Shalai Ahkang Naw Pat Da Ai Lam

Pajau Media

August 12, 2025

Lakawng maga gasat gala majan masa naw shaja nga ai Ka Mai, Hpakant Indaw Gyi lam hpe lai wa sai bat kaw nna hpaw sai raitim tsi mawan hte kaga gunrai n kau htaw shalai ahkang pat da ai re hpe chye lu ai.

Hpakant ginra kata gasat gala majan laja ai lai wa sai shata 2 daram kaw nna rai sai hte dai aten kaw nna Hpakant ginra de mawdaw hkawm sa ahkang pat da ai re. Ya aten namlaw namlap zawn re ai gunrai ni hpe sha naw mai shalai ai re lam chye lu ai.

Madaw daru hte gindun ai Mung masha langai tsun ai hta “ Hkrun lam hkawm ai masha ni hpe gaw lai shangun ai, namlaw namlap zawn ai ni, gunrai jahkraw n kau hpe gaw htaw ahkang jaw da ai, Tsi mawan, N-gu, sha sau, Jak sau, Desel hte amyu shayi ni a shata lang zawn re ai ni hpe n shalai ai, Ka- Mai maga grau shata lahkawng masum pyi rai wa sai, In Daw Gyi maga de gaw shata mi jan wa sai ” nga nna tsun ai re.

Dingyang sha nga ai malu masha gunrai ni rai nga ai N-gu hte sha sau ni sha n-ga amyu shayi ni a shata lang arai hte hkam ja lam hte seng ai tsi mawan ni, Jak sau, Desel ni hpe shalai ahkang naw pat da ai re hpe mung chye lu ai.

“ N kau gaw sha na naw lu ai majaw zim taw ai re, anhte zawn re ai ni gaw sha na n nga sai ngu ai kaw na gaw tsep kawp n nga ai, n-gu wa mari yang mawdaw n du ai majaw manu shatsaw dut ai, shanhte dut ya ai hpe mahtang chye ju dum ra na zawn, manu tsaw tim mari sha ra taw ai ga rai nga ” nga nna Hpakant ginra masha langai matut tsun da ai re.

Lahkawng maga ya aten hpyen masa a majaw shani shagu na matu shimlam grai myit tsang ra ai, Hpakant ginra masha ni gaw maga mi de gunrai manu tsaw rawt ai masa hte gunrai taw nga ai masa ni hkrum katut ai majaw grai yak hkak nga ai re hpe mung chye lu ai.

Shiga- ND