Hpakant Ginra Lam Hta Laja Lana Jep Joi Ai Sha N-ga Hkawm Sa Hkawm Wa Lam Chyat Ai Majaw Gunrai Htaw Sha Ai Ni Yak Hkak Nga Ai Lam

Pajau Media

July 29, 2025

Hpakant ginra hkawm sa lam mayan hta gasat gala majan jahkring hkring byin ai majaw hkawm sa hkrun lam lapran laja lana Jep joi sha n-ga Hkawm sa lam pat ai majaw U, Wa, htaw hpaga galaw nga ai mung masha ni sum machyi ai lam byin nga ai re hpe chye lu ai.

“ Hpakant lung wa ai lam hta lam lapran kaw chyat taw ai aten ni na wa ai majaw U, Wa htaw shalai ai hta yak hkak ai, U, Wa ni lam lapran kaw si sum ai, sum machyi ai lam law ai” nga nna tsun ai.

Hpakant lam mayan hta lam lapran chyat nga ai ni hte Myen hpyen dap shagyit ni hta gunrai pru shang lam hpe jep joi nga dingyang re majaw Hpakant ginra hta ya ten du hkra gunrai manu ni tsaw rawt nga dingyang re hpe mung chye lu ai.

Hpakant Muklum hta gunrai manu ni tsaw ai hta Shan, Nga manu ni gaw Sen lam du nga ai sha n-ga U di hkum mi kaw 1000, Bahkri Si joi mi kaw 20000, Sau joi mi kaw 40000 hte kaga gunrai manu ni mung tsaw rawt nga dingyang re hpe mung chye lu ai.

Ya aten du hkra Hpakant lam lapran chyat nga dingyang rai nna Hpakant lung na mawdaw n kau gaw Hopin kaw nna n htang ra ai re hpe mung chye lu ai. Dai sha n-ga ဟိုပင်ရွာသစ်ကြီး shara kaw Lung wa Yu wa mawdaw ni hpe pat da ai majaw Deng 7 hkauna pa lam makau kaw nna Pyi Htawng Su lam dingyang Hopin muklum de hkawm sa nga ai lam chye lu ai.

Shiga- Hpring