Hpakant ginra Lawng Hkang Mare Kaw Gasat Gala Majan Byin Ai Lam

Pajau Media

May 28.2025

Jinghpaw mung Hpakant ginra Lawng Hkang mare kaw May 27 ya shana kaw nna Myen hpyen dap N-gun 600 daram htu shadut shamu shamawt wa ai majaw May 28 ya jahpawt (8:00) Am daram kaw nna gasat gala majan byin nga sai re.

“Mani kaw na re sai Myen hpyen dap n-gun 600 jan daram re, dai hpawt hkying 8 daram kaw nna sinat n sen ni na taw sai, ginra masha law malawng gaw mana kaw na hprawng yen taw sai, n kau gaw Mare kata kaw naw chyat rawng nga ma ai” nga nna ginra masha langai tsun ai.

Gasat gala majan byin wa ai majaw Mung masha n kau hprawng yen hkawm ai ni nga ai zawn n kau gaw mare kata kaw naw nga ai ni mung nga ai lam chye lu ai.

Mying n tsun mayu ai mare masha langai tsun ai mung , “ Lawng hkang, Maw Si Zar kaw na Paw U seng shawng kaw PDF ni lam pat da ai, N lai shangun ma ai, gara de hprawng ra na re n chye, gasat gala byin taw ai Hkun Sa Kung maga gaw yawng ngu na daram hprawng yen taw sai, n dai maga gaw chyawm n hprawng shi ai ni mung nga ai” nga nna tsun ai.

Ya aten Hpakant ginra shara (3) kaw gasat gala majan byin nga nna Myen hpyen dap kawn gap dat ai Lak nak kaba si a majaw Lawng hkang kaw nna Mung masha dum nta hte Mahkrai langai hten za mat ai sha n-ga Mung masha asak si sum, hkala hkrum ai lam mung nga ai re hpe chye lu ai.

Myen hpyen Dap gaw Hpakant ginra hpe bai zing madu la na matu Ka Mai, Nam Ting lam hku sha n-ga Indaw Gwi Hka lam hte Se Zin lam hku nna Hpyen man (3) maga hku nna htu shadut htim gasat nga ai re hpe mung chye lu ai. Dai sha n-ga Lawng hkang ginra kata Myen n-gun jat htu shadut wa ai Myen hpyen dap gaw Mung masha ni hpe Rim adup ai lam ni galaw ai lam mung chye lu ai.

Shiga- Hpring