Hpakant Ginra Majan Masa Grai Laja Nga Ai Re Sha N-Ga Mara Kata Mung Masha Ni Gap Sat Hkrum Ai Lam Ni Byin Nga Ai Lam

Pajau Media

November 13, 2025

Jinghpaw Mung Hpakant ginra hta Myen hpyen dap gaw November 9 ya kaw nna hpyen n-gun kaba hte htu shadut shamu wa ai sha n-ga mara kata Mung masha ni gap sat hkrum ai lam ni matut manoi galaw nga ai re lam ginra masha ni kaw na chye lu ai.

Myen hpyen dap gaw November 10 ya shana hkying 10 aten daram hta mung Mung masha ni nga ai Hotel gawk ni hkan shang nna jep joi ai lam ni galaw nga ai lam chye lu ai. Dai aten hta sha Cycle hte Maw Si Zar maga kaw nna wa ai Mung masha lahkawng hpe Myen hpyen dap kawn gap sat ai lam chye lu ai.

Hpakant ginra hta Myen hpyen dap gaw hpyen shamu ai lam grau galaw nga ai sha n-ga gasat gala majan kata sum machyi ai lam ni nga ai hte gasat gala nbyin ai shara hkan du hkra Nbungli bawm hkan jahkrat ai lam, laknak kaba hte hkrup mara gap ai lam ni galaw nga ai re hpe mung chye lu ai.

Myen hpyen dap gaw November 11 ya shani hkying 1 jan aten daram hta Y-12 Nbungli pyen gawai ai hpang Taw Maw, Kahtan Yang hte Ginsi maga de yawm htum bawm 10 lang daram jahkrat bun ai rai nna Lawng Hkang Ninghtawn kata na Kahtan Yang mare kaw nga ai Mung masha dum nta ntsa kaw wa hkrat ai hta amyu shayi langai asak si sum nna Ma kaji langai hkra hkala ai lam chye lu ai.

Hpakant ginra hta lai wa sai October shata ka-ang daram hta hpyen masa loi zim ai raitim November 9 ya kaw nna hpyen shamu shamawt lam grau galaw wa ai majaw Myen hpyen dap hte Rawt malan pawng hpawm hpung ni lapran ang katut gaasat gala majan bai byin wa ai re. Myen hpyen dap gaw Hpakant ginra hta Ra lata poi galaw na matu hpyen hpung hku htu shadut shamu ai lam matut manoi galaw nga ai re.

Shiga – Htu Seng