Hpakant Ginrara Na Myen Hpyen Dap N-gun Nkau Htingnut Mat Ai Raitim Naw Ngam Ai Ni Matut Manoi Hpyen Shamu Nga Ai Lam

Parjau Media

October 17, 2025

Hpakant Ginra hpe zing madu lu hkra Myen hpyen dap gaw lai wa sai April shata kaw nna htu shadut htim gasat wa ai re hte ya aten hpyen n-gun n kau gaw Ka Mai Lam maga de man yawng htingnut mat ai lam nga ai re hpe chye lu ai.

Bai htingnut mat ai hpung ni gaw Maw Si Zar Phayar Kung hte Ameik Pon kaw dap jung ai N-gun 200 grup yin nga ai hpung ni re hte October 14 ya daram kaw nna bai htingnut mat ai re lam ginra masha ni tsun da ai kaw na chye lu ai.

Myen hpyen dap gaw Hpakant Ginra de hpyen n-gun kaba htu shadut ai lam lang hte lang nga ai hta Hpakant Ginra de sha Hpyen n-gun 1,000 lam htu da ai masa nga ai nga nna hpyen masa maram nga ai ni tsun ai re.

Hpyen n-gun n kau htingnut mat ai nga tim Maw Wan Kaji, Maw Wan Kaba, Maw Shan Ginra hkan Dap jung ai ni naw ngam ai hte Hpakant Nam Mapyit Mare hkan mung Mare kaw nan wa shang nga taw ai bat mi daram rai wa sai lam Nam Mahpyit Ginra masha tsun ai.

"Myen ni shang wa ai shaloi mare masha n kau gaw yen mat ai, anhte chyawm n yen ai, Myen hpyen la ni mung hkum hkrit, hkum hprawng nga di tsun ai, mare kaw wa nga ai bat mi jan wa sai ga rai nga, Mare masha n kau mung mare de bai wa nga ai ni gaw nga sai" nga nna tsun ai re.

Ya aten Hpakant Ginra kata Laknak kaba gap ai n sen ni gaw naw na nga dingyang raitim Malang mare maga de n dai laman gasat gala zim taw ai masa re hpe mung chye lu ai.

Jinghpaw Mung Hpakant Ginra hta Tatma 33 hte Mogaung Ginra kaw daju ai Ts.K.Hk (စကခ) Dap kata na Hpyen hpung ni, Sam Hkyeng P.T.Ts pawng hpawm hpung ni matut manoi hpyen shamu nga dingyang re lam chye lu ai.

Ya na zawn Hpakant Ginra na Hpyen n-gun n kau htingnut mat ai gaw kaga hpyen man de n gun garan ai lam, galai gachyai galaw ai lam ni mung mai byin ai hte Hpakant Hpyen masa gaw naw la yu taw ra ai masa re lam mung tsun nga ma ai re.

Shiga - Pyilan U