Hpakant Ginwang Kata Na Mare Kahtawng (6) Daram Kaw Nna Mung masha (2,000) Jan A Matu Nga Shara, Malu Masha Hte Tsi Mawan Ni Grai Ra Kadawn Nga Ai Lam Uru Seng Maw Ginwang (UGZ) Kawn N Dau

Pajau Media

May 13, 2025

Jinghpaw mung Hpakant ginwang Seng Hpara, Kap Maw Zup, Nam Ya, Nam Ting hte mare kahtawng (6) daram kaw nna Mung masha (2,000) jan a matu nga shara, malu masha tsi mawan ni grai ra kadawn nga ai lam Uru Seng Maw Ginwang (UGZ) kawn n dau da ai re.

Dai hpyen yen mung masha ni kaw na marai (1,252) hpe gaw ya aten U Ru Seng maw ginwang Buga (14) kaw shara jahkrat da ya ai re hte shanhte a matu nga shara malu masha, Tsi mawan ni, Kaga jai lang na arung arai kaw na hkawt hkyak hkyak ra kadawn nga ai lam chye lu ai.

Ya aten Ni nawn ai Nam Maling hkan hpyen koi yen nga ai Kap Maw, Seng Hpara hte Nam Ya mare kaw na Mung masha marai (1,231) hte Sut awng Yang mare kaw nna koi yen wa ai marai (103) naw ngam nga ai rai nna Nam hkan bra nga ai Hpyen koi yen mung masha ni hpe gahkyin la na matu hkyen lajang nga ai lam mung chye lu ai.

Ya aten hpyen koi yen mung masha ni hpe nga shara jaw da ai shara gaw Hpaji jawng ni hkan rai nna Jawng hpaw aten ni mung du wa ai majaw shara htawt sit ra wa ai masa hta grai yak hkak nga ai lam chye lu ai.

Kalang bai laja wa ai Hpakant ginra gasat poi a majaw Myitkyina Hpakant lam ntsa na mare kahtawng (10) kaw nna Mung masha ni gaw April 24 ya kaw nna hpyen koi yen hkawm ra mat ai re lam chye lu ai.

Shiga- Htu Seng