Hpakant Ka Mai Lam Hkrunlam N Hkawm Shi Na Matu Mawdaw La Ni Sadi Jaw Ai Lam

Pajau Media

August 13, 2025

Hpakant Ka Mai Lam shara ni hta gasat gala majan byin ai majaw dai lam hku nna n ahkyak yang n hkawm shi na matu Mawdaw la ni tsun sadi jaw ai lam nga ai re.

Mawdaw La langai tsun ai hta “ n ahkyak yang gaw nsa ai grau kaja ai, Myen hpyen dap gaw hpyen n-gun htu shadut nga ai majaw lahkawng maga gasat gala majan byin nna Myen hpyen dap kawn lak nak kaba ni, bawm kapaw ai lam ni galaw ai majaw hkra hkala ai Mung masha ni nga ai” nga nna tsun ai re.

Hpakant Ka Mai Lam ni hta KIA pawng hpawm hpung ni hte Myen hpyen dap gaw August 10 ya kaw nna gasat gala bai byin hpang wa ai rai nna Ma U pin mare makau hkan gasat gala laja nna hkam bawm mung myit tsang ra ai lam chye lu ai.

Dai lam hku nna Myen hpyen dap n-gun kaba hte du shang wa ai hpang gasat gala byin ai rai nna ya aten du hkra gasat gala byin nga ai re hte Hpakant pru shang lam ni kaw mung gasat gala majan bai byin ai re lam chye lu ai.

Lai wa sai May shata htum maga kaw nna Hpakant muklum de Myen hpyen dap hpung ni du shang wa ai hpang kaw nna Hpakant ginra majan masa laja ai gaw ya aten du hkra re hpe mung chye lu ai.

Ya aten gasat gala majan laja ai Hpakant ginra de Lak nak kaba, Drone, hte nbungli bawm ni grai naw sadi maja ra ai lam KIA/ KPDF hpung ni sadi jaw da ai re hpe mung chye lu ai.

Shiga - Hpring