Hpakant Ka Mai Lam Lapran Gasat Gala A Majaw Mawdaw La Hte Hkrun Lam Hkawm Masha Langai Asak Si Sum Ai Lam

Pajau Media

August 15, 2025

Hpakant Ka Mai lam ntsa Nam Ya mare makau kaw KIA/ KPDF hte Myen hpyen dap lapran August 14 ya shani ka-ang daram hta gasat gala majan byin ai aten drone bawm hkrat kapaw ai majaw Maw daw La hte hkrun lam hkawm masha langai asak si sum nna marai langai hkala sawng ai lam chye lu ai.

“ Mawdaw sara Ko Kayin Lay gaw dai shara kaw nan asak si sum mat ai, dai mawdaw hpang kaw lawm wa ai hkrun lam hkawm masha langai mung baw kaw hkra hkala ai, langai wa mung Labawp nra daw mat ai, baw kaw hkra ai wa gaw Hpakant du ai hte asak si sum mat ai” nga nna ginra masha langai tsun ai.

Asak si sum mat ai mawdaw sara wa gaw Asak (30) ning daram rai nna Hpakant kaw nna Myitkyina yu wa ai Nam Ya mare makau kaw gasat gala a majaw mawdaw ni hpe jahkring da nga ai aten mawdaw ntsa kaw nan Drone wa hkrat kapaw ai majaw dai shara kaw nan asak si sum mat ai re hpe mung chye lu ai.

Ginra masha langai mung tsun ai hta “ hkrun lam hkawm ni mung Nam Ya ginra masha ni mung Drone bawm hkra dat, bawm hkra dat hte shani shagu na taw ai, myit n pyaw la ai, ya gaw mare kaw law malawng n nga sai, nam de hkrai yen mat sai, ya na masa hta n sim sa ai majaw mare de bai wa nga na matu lam hpaw da ai raitim ya aten hkrun lam hkawm ai ni n galaw yang kaja ai, galoi hpa byin na n chye ai majaw sadi hte nga ai gaw kaja dik re” nga nna tsun ai re.

Dai hkrun lam gaw lai wa sai August 2 ya kaw nna gunrai htaw mawdaw ni, hkrun lam hkawm mawdaw ni lung dat yu dat rai na hkawm sa nga ai rai nna ya aten lahkawng maga gasat gala bai byin nga ai re hpe mung chye lu ai.

Shiga – ND