Hpakant Lam Kap Maw Kaw Na Mung Masha Ni Hpe Myen Hpyen Dap Rim Woi Mat Ai Lam Ni Galaw Nga

Pajau Media

November 21, 2025

Majan a majaw mare dum nta hpe yen kau da nna kadai mung kadai shimlum dum ai de koi yen nga ai Kap Maw ginra masha ni gaw hpyen koi yen aten ladaw na sai re majaw dum nta sun wang ni hpe bai wa gawan ai aten Myen hpyen dap rim woi hkrum ai lam chye lu ai.

 Ndai bat laman hta sha Kap Maw mare na Slg.Hpaulu Brang Lai hte Hpt. Ndau Tu Lar ngu ai yan gaw mare de dum nta, sun wang, Dumsu, Nga wa gawan ai kaw nna lam lapran kaw Myen hpyen dap kawn rim woi mat ai lam chye lu ai.

November 19 ya shana daw hta gaw Hpt. Ndau Tu Lar hpe bai dat ya ai lam nga tim Slg. Hpaula Brang Lai gaw naw mat nga ai re lam chye lu ai. Slg. Hpaulu Brang Lai gaw ya du hkra dum nta masha ni hte matut mahkai lam n lu, shiga mung nna ai n htoi 4 ya ram na wa sai re majaw dum nta masha ni grai myit tsang nga ma ai re hpe mung chye lu ai.

Myen hpyen dap gaw Hpakant lam Kap Maw Mare Kawng Mayan hkan sha shara jahkrat shamu shamawt nga ai re majaw ginra masha ni gaw dum nta de mung n gwi wa ai hte hpyen majan bai laja wa na hpe myit tsang ai majaw naw koi yen nga dingyang re lam chye lu ai.

Myitkyina Hpakant lam mayan de myen hpyen dap gaw lai wa sai April shata kaw nna hpyen n-gun kaba hte du shang wa ai majaw gasat gala majan laja wa ai hte ginra masha ni hpyen koi yen hkawm ai gaw ya aten du hkra re hpe mung chye lu ai.

Shiga – Pyilan U