Hpakant Lam Mayan Gasat Gala Majan Laja Nga Dingyang Rai Nga Ai Lam

Pajau Media

May 23.2025

Jinghpaw mung Hpakant ginra de Myen hpyen dap hpyen n-gun htu shadut ai majaw Nam Ting Mare makau hte Hkrai run mare makau mayan hta KIA pawng hpawm hpung ni hte gasat gala majan laja nga ai lam shawng lam shiga kaw na chye lu ai.

“ Myen hpyen dap gaw htingnut ai zawn zawn re na kalang ta Nam Ting maga hte Hkrai Run maga hku nna Hpyen n-gun htu shadut wa ai majaw gasat gala laja nga ai re” shawng lam shi sawk ni tsun ai kaw na chye lu ai.

Myen hpyen dap pawng hpawm hpung ni gaw Lawng Hkang Lay Pye kaw nna Deng (5) ,(6) daram tsan ai de hpyen n-gun jat sa ai aten KIA pawnghpawm hpung ni kawn hkap shingla ai re. Gasat gala byin ai sahra de Hpakant Pyuha kawng kaw nna mung lak nak kaba ni gap shadam ai lam chye lu ai.

 May 22 ya lani mi hta sha KIA masat (26) Dap dung ginra, KIA hpung ni shara la da ai Sanun Kawng maga de Myen hpyen dap P.T.Ts pawng hpawm hpung ni htu shadut htim gasat ai majaw gasat gala majan laja ai re.

Myen hpyen dap gaw Hpakant ginra hpe jum tek madu lu na matu htu shadut nga ai hte ya aten Nam Ting, Hkrai Run mare mayan de hpyen masa grai laja hkat nga ai re sha n-ga KIA maga kawn mung hkap shingla gasat nga dingyang re majaw Hpakant lam mayan gasat gala majan grau laja wa mai lam tsun ai re.

Hpakant ginra de myen hpyen dap pawng hpawm hpung ni htu shadut htim gasat nga dingyang re ai hta Hpakant Pyuha kawng kaw nna Lak nak kaba gap garum ai lam, May 21 ya hta mung Lak nak kaba (3) lang daram gap bun ai lam chye lu ai.

Shiga- Hpring