Hpakant Lung Hkang Kaw Na Maw Langai Hta Ga Gyi Ai A Majaw Bungli Galaw Masha 20 Jan Ga Kata Lawm Mat

Pajau Media

February 17, 2026

Jinghpaw mung Hpakant muklum Lung Hkang mare Kade Maw kaw nga ai 111 lung seng nhkun shara hta mani February 16 shana hkying 9 chyen laman ga gyi ru wa ai majaw bungli galaw masha 20 jan ga gyi ai kaw lawm mat ai hpe ginra masha ni tsun ai kawn chye lu ai .

“Nnan byin ai shaloi gaw 20 jan lawm mat ai rai tim ya gaw 10 jan hpe gaw rai nmu tam shi ai,” nga nna ginra masha ni tsun ai.

Ya ten hta masha tam ai lam ni galaw hpang wa sai rai tim jak rung rai hte masha n-gun nlaw ai majaw karum kahtau mayak ni hkrum nga nna dai ni February 17 ya manap aten du hkra marai 10 jan naw mat nga ai lam hpe chye lu ai.

Ya ten Hpakant muklum kaw nga ai karum kahtau hpung , myen mung karum kahtau hpung hte ginra kata kaw nga ai laga karum kahtau hpung ni kaw na naw matut tam taw dingyang re hpe chye lu ai.

Jinghpaw mung lung seng maw ginra re ai Hpakant ginra hta ya ten majan byin nga ai sha n-ga shaning shagu ga gyi ai a majaw shara ni hten bya nga ai re hte bungli galaw masha asak si sum ai lam ni byin taw ai hpe chye lu ai.

Shiga-Hpring