Indaw Gyi Ginra Hta Asak 18 Ning Npu Jawng Ma Ni Hpe Hpyen Wunkat La Na Matu Tsun Shadut Ai Lam

Pajau Media

February 18, 2026

Jinghpaw mung Mohnyin Indaw Gyi ginra hta SNA P.T.Ts hpung ni gaw Asak 18 ning n hpring shi ai jawng ma ni hpe hpyen wunkat la na matu jahkrit shama tsun ai lam ginra masha ni kaw na chye lu ai.

SNA dap ni gaw nta langai kaw na langai hpyen de n shang n mai nga nna mare salang ni hte matut mahkai nna hpyen lahkawn ai lam ni galaw nga ai sha n-ga lawu tsang, lapran tsang hte lahta tsang jawng ma ni hpe du hkra hpyen wunkat la na matu ta masat htu shangun ai lam ni galaw ai re hpe chye lu ai.

“Ya san poi gaw htai nna ma ni hpe shanhte na lawk uphkang salang ni hte pawng nna hpyen wunkat lung na matu ta masat htu shangun ai” nga nna ginra masha langai tsun ai re hpe mung chye lu ai.

Myen hpyen dap hte SNA dap ni gaw February praw kaw nna Indaw Gyi ginra Mai Nawng , Bo Te Kung hte kaga mare ni hkan hpyen lahkawn ai lam ni galaw nga ai re.

Ya aten Jinghpaw mung Indaw Gyi ginra hte Banmauk ginra ni hta mung myen hpyen dap pawng hpawm dap hte SNA dap ni, Chya Hpyu hpyen hpung ni hte rawt malan hpung ni lapran gasat gala majan byin nga dingyang re lam chye lu ai.

Shiga – Hpring