Hpakant Lungseng Maw Hkan Nga Ai Company Nkau Hkan Lang Ai Jakrung Jakrai Ni Hte Company Kata Kaw Nga Ai Nta Ni Hpe Myen Hpyen am

Pajau Media

13 June 2025

Myen hpyen gunshem dap hte Shanglawt hpyen dap lahkawng maga na ja grumhpraw shang shara Hpakant Lungseng maw hkan nga ai company nkau hkan lang ai jakrung jakrai ni hte company kata kaw nga ai nta ni hpe ndai hpang daw laman jahkring hkring wan nat jahten ya nga ai.

Mung masha langai mi gaw “ Myen hpyen dap ni gaw Hpakan Mawsi Zar kawng kaw dap dung shara la ai bat lahkawng sha naw re , company wang hkan shang nna masha hpe rim ai gayet ai, nlung shaw ai shaloi hkan lang ai mawdaw jakrung jakrai ni hte company wang hkan nga ai nta ni hpe wan hkan nat ai ’’ ngu tsun ai

Lai wa sai May shata htum kaw na Hpakant Mawsi Zar Parakawng hta myen ni shang dap dung wa nna laknak kaba ni jahkring hkring gap shadam ai mung nga ai zawn nkau lungseng htu shara hte company na lungseng htu ai shaloi lang ai Backhoe hte ga htaw mawdaw ni hpe wan nat jahten hkrum taw nga ai.

June shata shawng na bat hkan mung Hpakant muklum nhpang sut rai htu ai shara hta htu taw nga ai company a Backhoe zawn re ai mawdaw hpe sha n-ga nta ni hpe mung myen hpyen dap ni kawn wan nat kau ya ai.

Dai hta n-ga June shata praw 10 ya shana maga hta mung Mawsi Zar U Zaw Naing Htay company kata kaw nga ai nlung htu ai shaloi lang ai jakrung jakrai ni hpe myen hpyen dap ni hte P.T.Ts hpung ni kawn wannat jahten kau ya ai.

Myen hpyen dap hte manghkang nga ai Company shara kaw nga ai mawdaw ni hte nta ni hpe mung wan nat jahten hkrum taw ai lam hpe mung masha ni tsun ai.

Shiga-ND