Hpakant Mashi Kahtawng Kaw Bawm Kapaw Ai Majaw La Langai Baw Ayai Asak Si Sum Mat Ai Lam

Pajau Media

July 30, 2025

Hpakant Mashi Kahtawng Aung Myu Thu Mawdaw byeng ai seng makau kaw July 30 ya Jahpawt 7:00 Am aten daram hta bawm kapaw manghkang byin nna La langai baw ayai mat nna asak si sum mat ai lam chye lu ai.

Bawm kapaw ai mabyin hpe myi chyaw mu Mung masha langai tsun ai hta “ shi masa hpe yu yang Ka-ni lu sha masha hte bung ai, palawng mung n hpun da ai, labu mung Half Pant hte, bawm n kapaw shi ai aten kaw nna dai mayan kaw lama ma tam hkawm ai zawn re na nga ai re, kade n nan yang bawm kapaw sai gaw, ya gaw Ka-ni lu sha masha ni hpe gumhpraw kaji kajaw jaw ai hte kam ai mai shangun ai majaw bawm wa hkam shangun ai kun lama ma gaw re” nga nna tsun ai re.

Asak si sum mat ai wa gaw Asak (30) ning grup yin nga ai la langai rai nna Ka-ni nanghpam lu sha ai masha mai byin ai lam ginra masha ni tsun maram nga ma ai re. Asak si sum mat ai wa hte seng nna kadai gara kaw na re ngu hpe gaw n chye lu ai re.

Hpakant ginra hta hpyen masa shaja hkat wa ai hpang kaw nna ya aten du hkra Mung masha ni dingyang lai wa lai sa galaw nga ai Mare ka-ang lam maw ntsa hkan du hkra sinat gap sat manghkang ni jahkring hkring byin nga ai majaw grai sadi maja let nga ra ai ginra re hpe mung chye lu ai.

Shiga- ND