Hpakant Mawwan Maga De N bungli Bawm Jahkrat Ai Lam

Pajau Media

July 21.2025

Hpakant ginra Mawwan Kaji maga de July 20 ya shana daw Hkying 4:00 PM aten daram hta Myen hpyen dap n bungli bawm wa jahkrat bun ai lam nga ai re hpe chye lu ai.

“ Gasat gala byin taw ai gaw Maw Maw lamyang, Mawwan Kaji, Mawwan Kaba maga de byin ai re, dai maga de hkawm sa hkawm wa mung pat da ai, hpyen n-gun htu shadut ai mung dai maga de re, dai ni mung hpyen n bungli bawm wa jahkrat bun ai re” nga nna Hpakant ginra masha tsun da ai re.

N bungli bawm wa jahkrat ai Mawmaw Layang, Mawwan Kaji Kaba maga de hkawm sa hkawm wa lam ni mung pat da ai rai nna ya aten hpyen masa grai shaja hkat nga ai re hpe mung chye lu ai.

Lai wa sai July 18 ya shana daw Hkying 5:40 hte 6:00 PM lapran hta mung Hpakant Palahka mare kaw mung Myen hpyen dap Jet N bungli hte bawm lahkawng lang wa jahkrat ai re. Hpakant Pyuhakawng kaw Dap Jung ai Myen hpyen dap hpung ni mung Lak nak kaba gap shadam ai majaw Hpakant lahta tsang jawng shawng kaw gat dut nga ai Mung masha ni hte lai wa lai sa ni hkala hkrum ai lam chye lu ai.

N dai laman Hpakant ginra de Myen dap hte KIA pawng hpawm hpung ni lapran gasat gala majan laja nga ai ginra ni hte gasat gala n nga ai ginra ni de du hkra Myen hpyen dap gaw n bungli bawm wa jahkrat bun ai lam ni nga ai re hpe mung chye lu ai.

Shiga – HitngNai