Hpakant Muklum Mazup Yang Mare Kade Maw Makau Mayan De Myen Hpyen Dap Kawn Sinat Kapaw Htu Shadut Shang Wa

Pajau Media

June 5, 2025

KIA masat (9) dap ba ginra rai nga ai Hpakant muklum Mazup Yang mare Kade Maw makau mayan de June 5 ya jahpawt daw kaw nna Myen hpyen dap kawn sinat kapaw htu shadut shang wa ai lam chye lu ai.

Dai hpyen hpung ni gaw Mawsiza mare kaw nna Myen hpyen hpung lahkawng hte htu shadut shang wa ai re lam chye lu ai.

Dai sha n-ga masat (26) dap dung ginra rai nga ai Mohnyin Hepa mare makau grup yin hta mung June 4 ya shana daw hkying 5:00 PM aten kaw nna Myen hpyen dap htu shadut shamu shamawt wa ai majaw KIA hpyen hpung ni hte ang katut gasat gala byin ai lam chye lu ai.

Hepa mare kata de gasat gala byin ai aten Myen hpyen dap kawn Jet n bungli hte bawm wa gap ai majaw mung masha dum nta langai hten za mat ai raitim mung masha hkra hkala ai lam gaw n nga ai re hpe chye lu ai.

Ndai laman KIA Masat (9) dap ba Hpakant ginra kata Myen hpyen dap hte P.T.Ts pawng hpawm hpung ni hpyen n-gun kaba hte hpyen shamu shamawt wa ai lam matut manoi galaw nga ai majaw gasat gala majan laja wa na hpe ginra masha ni myit tsang nga ma ai re.

Shiga – Htu Seng