Hpakant Nam Ya Myen Hpyen Dap Hpe Htim Gasat Hpang Nga Sai Lam

Pajau Media Channel

9th April, 2024

Myitkyina-Hpakant hkawm sa hkrun lam ntsa kaw nga ai Nam Ya mare myen hpyen dap post hpe April 9 ya jahpawt (6:00) AM aten daram kawn KIA pawng hpawng hpyen hpung ni htim gasat hpang nga sai re.

 Nam Ya myen hpyen dap Hk.M.Y (120) kata P.T.Ts n-gun yawng pawng yang hpyen n-gun (200) grup yin nga ai re hte hpakant hkawm sa hkrun lam ntsa hta n-gun kaba dik ai dap shara langai re hpe mung chye lu ai. KIA pawng hpawng hpyen hpung ni htim gasat ai hpang hpyen nbungli ni hte laknak kaba ni grai gap sharu bun nga dingyang re hte ya shiga ka nga ai aten du hkra laja lana naw gap gasat nga dingyang re lam chye lu ai.

Dai ginra mayan na mung masha ni gaw kadai mung kadai shimlum dum ai shara ni de hprawng koi yen hkawm nga sai re. Hpakant lam ntsa hkan na mung masha ni shimlum ai shara de lawan koi yen na matu jau tau tsun ai lam ni nga ai re majaw mare kata kaw mare masha ni n nga ai daram rai sai re hpe mung chye lu ai. Ya aten gasat gala majan a majaw hkawm sa hkrun lam hpe gan pat tawn da ai re. Ya aten jinghpaw mung shara shagu hta gasat gala majan ni byin nga ai re hte hpyen masa gaw grai shaja hkat nga ai re hpe mung chye lu ai.