Hpakant Pyuha Kawng Kaw Nna Gap Dat Ai Laknak Kaba A Majaw Hpunggyi Ni Hkala Nna La Langai Asak Si Sum

Pajau Media

August 27, 2025

Hpakant Pyuha Kawng kaw shadun da ai laknak kaba hte shani shagu gap bun ai majaw Mung masha hkra hkala asak si sum ai lam matut manoi byin nga ai re lam chye lu ai.

August 26 ya shana daw hta Hpakant Pyuha Kawng kaw nna gap dat ai laknak hte drone bawm gaw shara shagu ngu na daram hta hkrat kapaw ai hta မဏိဇေယျုံကျောင်းတိုက် lu sha len kata de drone bawm wa hkrat kapaw ai majaw U Zin marai langai hte Ko Yin marai (3) hkala hkrum ai lam nga ai.

Ginra masha langai tsun ai hta “ shana daw maga မဏီဇေယျုံကျောင်းတိုက် kaw wa hkrat kapaw ai, asak si sum ai masha gaw n lawm tim Hpunggyi(4) hkala mat ai, shana tup bawm kapaw nsen chyu na taw” nga nna tsun ai re.

Ndai laman Hpakant ginra de laknak kaba sha n-ga Drone bawm, Nbungli bawm ni hkrup mara gap jahkrat ai lam grau galaw ai sha n-ga gasat gala majan mung byin nga ai rai nna mana de du hkra sinat nsen matut manoi na nga ai lam Hpakant ginra masha matut tsun ai re.

“ N dai laman Seng Tawng 7 Star makau kaw mung langai wa hkrat ai, Pazan Chauk maga na Company Wang hta mung langai wa hkrat ai, ngam ai gaw Yu Ma, Seng Tawng Muklum koi lam maga de mung hkrat ai nga na ai, hten za ai masa hte hkala hkrum ai lam gaw tup hkrak n chye shi ai” nga nna tsun ai.

Dai zawn sha August 27 jahpawt daw hkying 12 jan kaw nna nhkring nsa laknak kaba gap ai majaw Lawng Hkang Kahtan Mare makau kaw nga ai Miwa amyu sha langai asak si sum nna kaga hten za ai masa lam ni hpe matut sagawn nga dingyang re.

Shiga - ND