Hpakant Pyuha Kawng Kaw Nna Gap Dat Ai Laknak Kaba A Majaw Mung Masha Marai 7 Hkala Hkrum

Pajau Media

September 9, 2025

Myen hpyen hpung ni gaw September 9 ya jahpawt jau hkying 1 aten daram hta Pyuha Kawng kaw nna laknak kaba gap shadam ai majaw Mung masha marai 7 hkala hkrum ai lam chye lu ai.

"Shana yup tung aten yawng yup taw sai, Mung masha ni nga ai de nan shingte nna da sang gap ai re. Patsan Chyauk mare, Seng Tawng, Miwa Nawku Jawng shawng kaw mung wa hkrat ai, dai kaw gaw masha n hkala tim shara hten za ai, hkala masha marai sanit daram nga ai, Patsan chyauk kaw wa hkrat ai hta Daw Myit Myit Tan na myi man gaw grai sawng mat ai" nga nna Hpakant ginra masha tsun ai.

Laknak kaba a majaw Patsan Chyauk mare kaw na Daw Myit Myit Tan asak 45 ning myiman kaw sawng ai ningma lu mat nna, Asak 50 ning re ai U Win Myit gaw hkra lata hkala ai lam, asak 39 ning re ai U Hkai Mye gaw pai lata lahpum hkala ai lam chye lu ai.

Seng Tawng lawk 4 U Lan Ching, asak 40 ning, Asak 42 ning re ai Daw Hpyu hpyu win n shang kaw Hkala ai lam, seng Tawng lawk 3 kaw na Mg Myo asak 32 ning mung n shang hkra maga de hkala ai lam, Asak 45 ning re ai Zaw Win Gaw hkra lata Hkra hkala ai lam chye lu ai.

Hpakant Pyuha Kawng kaw nna gap dat ai laknak kaba 7 gaw shara kru daram hta wa hkrat kapaw ai re lam chye lu ai.

Jinghpaw Mung Hpakant Pyuha Kawng kaw nna gap dat ai laknak kaba a majaw Mung masha law law si hkala hkrum ai rai nna masing nga nga hte gap bun ai re lam ginra masha ni tsun ai.

Shiga - Kachyin Pyi Tar