Hpakant Seng Hpara Mare Kata Myen Hpyen Dap Shara La Nga Ai Lam

Pajau Media

September 25, 2025

Myitkyina Hpakant lam Seng Hpara mare kaw Myen hpyen dap, Dap Jung shara jahkrat nga ai majaw lai wa lai sa Mung masha ni hpe hkap jahkring san jep ai lam laja lana galaw nga ai lam ginra masha tsun ai.

Mare kata Mung masha dum nta hkan Myen Hpyen dap shara la nga ai hte n kau gaw KBC nawku jawng wang hkan shagyit hkan shara jahkrat nna nga ai lam chye lu ai.

Nawku jawng wang kata shara la nga ai hpung ni gaw lai wa lai sa ni hpe laja lana jep ai lam galaw nna ginra masha n kau gaw lai wa sai September 10 ya jan kaw nna Myitkyina maga de hprawng koi yen sai re lam chye lu ai.

Sabaw mare Lam Braw shara kaw mung Myen Hpyen dap hpung ni gaw wuhpung hku shara la shamu shamawt nga ai majaw ginra masha ni gaw gasat gala majan byin wa na hpe grai myit tsang ai majaw Myitkyina maga de jau tau nna koi yen wa ai re lam chye lu ai.

Seng Hpara mare masha ni gaw ya aten Myitkyina Jaw Masat hpyen koi yen dabang de koi yen ai ni nga ai zawn n kau gaw nam maling shara hkan koi yen ai ni mung naw nga ai re hpe chye lu ai.

Shiga- Htu Seng