Hpakant Seng Tawng Mare Kaw Rawt Malan Hpung Ni Hpyen Lahkawn Ai Hta Asak N Hpring Ai Amyu Shayi Ni Lawm Ai Lam

Pajau Media

October 6.2025

Hpakant Seng Tawng Sikmu mare kaw lai wa sai October 4 ya shana daw hkying 2 aten daram hta Rawt Malan Hpung ni Hpyen lahkawn ai hta Asak n hpring ai Num kasha ni lawm ai majaw Kanu Kawa ni myit tsang nga ma ai hte dat ya na matu hpyi shawn ai re hpe chye lu ai.

" Nam de na Hpyen lahkawn ai, Sikmu Maw Shan kaw na Pyi Lung Chan Tar gawk ngu kaw Myen makam masham poi a matu san seng lam galaw nga ai ramma marai 8 ram lawm mat ai, dai kaw 16/17 ning re ai Ma ni lawm ai" nga nna tsun ai.

Makam masham poi lamang a matu san seng lam galaw shang lawm ai ni hpe gawk ngu n tsa kaw na du hkra wa lahkawn ai hpe Mung masha ni tsun dinglun nga ma ai re.

Myen hpyen dap a gumshem ai akyang lai len hku n re sha Mung masha maga yu ya na matu hpyi shawn da ai re.

October shata praw hta mung hpyen lahkawn ai majaw hkrit nna Mye Za Pon hku hprawng hkawm ai La langai ninggam kaw na di hkrat si sum mat ai re hpe mung chye lu ai.

Ginra masha ni tsun ai hta Rawt Malan Hpung ni maga hpyen lahkawn ai hta Asak n hpring ai ni, Jawngma ni, CDM magam gun ni, hkum hkrang lagaw lata n hkum ai ni, hkam ja lam n nga ai ni, n ta masha langai ngai magam gun taw nga sai ni hpe gaw Kanu Kawa hte jahkrup nna bai dat ya ai lam nga ai re hpe chye lu ai.

Shiga - Kachin Pyi Tar