Hpakant Tawng Pyu Mare kaw Ma Ni Ginsup Nga Ai Aten Bawm Kapaw Wa Nna Ma( 1 )Asak Si Sum Mat Ai Re Hte Marai (3 )Hkala Hkrum

Pajau Media

February 14, 2026

Ya aten gasat gala majan laja nga ai Hpakant ginra hta hpyen laknak a majaw mung masha si hkala hkrum ai lam shani shagu byin nga ai re hte February 13 ya jahpawt daw hta mung bawm kapaw ai majaw Ma marai 1 asak si sum nna marai 3 hkala ai lam chye lu ai.

Hpakant Tawng Pyu mare kaw February 13 ya jahpawt daw hkying 8 aten daram hta Ma ni ginsup nga ai aten a kajawng sha bawm kapaw wa nna Mg Nay Win Tun asak 7 ning si sum nna , asak 3 ning re ai Min Thu Rein, asak 11 ning Nan Khine Soe hte Slg U Ko Lyin ni hkala ai lam chye lu ai.

Ma ni ginsup nga ai aten ya na zawn bawm kapaw wa ai gaw hkam bawm a majaw kun shing n rai laknak kaba wa hkrat ai kun, laknak hpe ma ni n chye na la gasup ai majaw kun ngu hpe gaw tup hkrak n chye lu ai lam ginra masha ni tsun nga ma ai re.

Gasat gala majan laja nga ai aten re hte Myen hpyen dap Tatma Kawng kaw nna laknak kaba mung shani shagu gap bun nga dingyang re lam chye lu ai.

Lai wa sai Feb 12 ya jahpawt daw hta mung hpakant Maw Wan lawk lam makau kaw kadai uhpung ni hkam ai re n chye lu ai hkam bawm a majaw Maw Wan kaw na hpung magam gun sara langai hkala hkrum mat ai lam chye lu ai.

Hpakant ginra kata lai wa sai shata kaw nna gasat gala majan laja wa ai re hte Myen hpyen dap gaw shani shagu nbungli bawm, laknak kaba ni gap bun nga dingyang re lam chye lu ai.

Shiga- Pyilan U