Hpung Ngai Yang Hpyen Koi Yen Dabang Hta Mung Masha Dum Nta Gaw Gap Ai Lam Law Malawng Ngut Wa Sai Lam

Pajau Media

January 8, 2026

Hkawm sa hkrun lam mayak a majaw dum nta gaw gap na matu yak hkak ai Hpung Ngai Yang hpyen koi yen dabang hta KBC garum gahtau hpung ni garum madi shadaw ai hte hpyen yen dum nta ni hpe nnan bai gaw gap ai lam galaw lu ai rai nna law malawng gaw ngut hkre wa sai lam hpyen koi yen mung masha tsun ai kaw na chye lu ai.

Hpyen yen aten ladaw gaw na wa ai hte buga de bai n htang wa na masing mung n mai byin shi ai re majaw hpyen koi yen dabang hta gaw gap da ai dum nta ni mung tsam wa nna dum nta nnan gaw gap la ra ai hpe KBC garum gahtau hpung ni garum jaw ai hte gaw gap ai lam hkrang shapraw galaw wa ai re lam tsun ai re.

“Hpyen yen kaw nga ai aten ladaw mung na wa, nga ai dum nta mung mu ga ginsum sha re majaw aten na yang tsam wa ai, dai majaw dum nta gaw gap na matu grai hkyen wa ai re, ya gaw garum ningtum ni garum ai gaw htinggaw 200 jan na matu garum gumhpraw hkrat wa ai , dai hte gaw gap hpang taw sai, law malawng gaw ngut wa sai ga re” nga nna hpyen koi yen dabang hpe yu nga ai salang wa tsun ai re.

Hpung Ngai Yang kaw shanu nga ai mung masha ni gaw lai wa sai 2024 May 11 ya kaw nna Myitkyina-Putao Lam gasat gala majan a majaw Sum Pyi Yang, Ntsi Yang, Wa Dat mare hkan na hpyen koi yen htinggaw 252 shanu nga ai hpyen koi yen dabang langai re.

ya aten du hkra buga de n htang wa na mahkrun n mu ai majaw hpyen koi yen dabang sha naw shanu nga ma ai re. Ya aten dum nta law malawng gaw gap ngut wa sai raitim garum ningtum hpung ni garum jaw ai gaw htinggaw 200 jan na matu sha gumhpraw hkrat ai hte htinggaw 15 daram na matu naw gaw gap shangut la ra ai lam hpyen koi yen mung masha ni tsun ai kaw na chye lu ai.

Shiga- Pyilan U