Hpung Ngai Yang Hpyen Koi Yen Dabang Kaw Nta Galup Na Marang Sumpan (Mu Ga) Grai Ra Kadawn Nga Ai Lam

Pajau Media

December 22, 2025

Hpung Ngai Yang hpyen koi yen dabang kaw dum nta n nan gaw gap na matu Mu Ga hkyak hkyak ra kadawn ai lam, kaga dum nta lang arung arai ni mung yak hkak nga ai lam hpyen koi yen mung masha ni tsun ai kaw na chye lu ai.

“ Dai ning gaw garum ningtum ni mung Mu Ga n jaw mat sai, nta galup na matu hpri hpraw mung n lu lang, Ding Kaw Lap ni hte sha galup na matu mung Putao de htet la ra ai, masha nan sa la na matu mung n mai taw, Myitkyina yu wa ai ni kaw htet yang mung hpyen dap shagyit ni grai lai di ra ai majaw yak hkak ai” nga nna hpyen koi yen mung masha langai tsun ai re.

Hpung Ngai Yang hpyen koi yen dabang a matu dai ning laman hta nga shara , nta galup na matu arung arai, n lang n mai zawn re ai arai ni hpe htaw shalai la na matu mayak law law nga ai majaw ginra masha ni dai hta grau yak hkak na hpe myit tsang nga ma ai re.

Myen hpyen dap gaw n bungli htim gasat ai lam matut manoi galaw wa ai hpang hpyen koi yen dabang hpe ntsa hku nna dan dan leng leng mu lu ai majaw nta galup ai lam hpe Ding Kaw ni galup na matu masing jahkrat wa ai hta dum nta galup na matu yak hkak wa ai re lam chye lu ai.

 Hpyen koi yen dabang hte ni nawn ai ai hkan nta galup na arai nlu ai hta Myitkyina-Putao lam lapran htaw wa htaw sa lam ni grai yak hkak ai hte jep joi shagyit ni law wa ai majaw mung grau yak ai lam hpyen koi yen mung masha ni tsun ai.

Mung masha 1000 jan nga ai Hpung Ngai Yang hpyen koi yen dabang kaw wa nga lahkawng ning jan wa sai re hte ya aten du hkra ra yang ra ai hku nam de koi yen ra ai aten ni mung nga ai re hpe chye lu ai.

Shiga- Mali HKu