Hpung Ngai Yang Hpyen Koi Yen Mung Masha Ni Nbungli Bawm Hkrit Tsang Ra Ai Majaw Kalang Bai Gahtap Yen Ra Ai Lam

Pajau Media

17 November 2025

Putao Ginra Sumpyi Yang mare kaw na Mung masha hkying mi jan gaw 2024 kaw na majan a majaw Hpung Ngai Yang de koi yen nga ai rai nna n dai shata kaw nna Nbungli hpyen myit tsang ra ai majaw Nam de kalang bai koi yen ra ai lam chye lu ai.

October shata hte November praw daram hta Putao Ginra Hkawng Lang Hpu maga de Myen hpyen dap Nbungli bawm 5 lang daram wa jahkrat ai sha n-ga Putao Myitkyina lam ntsa kaw mung Myen hpyen dap Nbungli bawm wa jahkrat bun ai lam ni nga wa ai re.

Sumpyi Yang hte Hpung Ngai Yang hpyen koi yen lapran kaw nga ai Nsai Yang mare kaw mung November 12 ya shani Nbungli bawm jahkrat bun ai lam ni galaw wa ai majaw hpyen koi yen Mung masha ni hte dai Ginra masha n kau gaw shimlum dum ai Nam de koi yen ai lam hpyen koi yen Mung masha langai tsun ai.

“Ndai laman Nbungli jahkring hkring sa ai, anhte hpyen koi yen dabang hte nau ntsan ai Nsai Yang mare kaw mung Nbungli wa jahkrat ai, anhte hpyen yen dabang Hpung Ngai Yang gaw Mytkyina lam ntsa kaw na re hte yawng gaw Mu Ga ginsum nta hkrai re majaw Nbungli bawm jahkrat bun wa mai ai, dai majaw ndai laman gaw mare ting ngu na daram Nam de koi yen nga ra ai” nga nna hpyen koi yen mung masha langai tsun ai re.

Ya aten du hkra Hpung Ngai Yang hpyen koi yen dabang kaw na Mung masha ni gaw Nam de bai gahtap yen ra ai masa lam ni a majaw asak kaba sai ni hte Ma kaji ni grai yak hkak nga ma ai re hpe mung chye lu ai.

Shiga - Mali Hku