Hpung Ngai Yang Hpyen Yen Dabang Kaw Jawng Hpaw Ten Du Wa Tim Jawng Nta Gap N Ngut Shi Ai Lam

Pajau Media

May 2, 2025

Gasat gala majan a majaw hpyen koi yen ai laning mi hkawt rai wa sai Hpung Ngai Yang hpyen yen dabang kata Ma ni a hpaji lam a matu shakut ya nga ai hta jawng hpaw ten du tim jawng n ta gaw gap shangut la na matu naw yak nga ai re hpe chye lu ai.

“Jawng hpaw ten gaw du wa, jawng nta mung tsam wa re ai majaw dabang masha ni na n-gun atsam hte jawng nta n nan gaw gap hpang taw sai re. Mi gaw KG kaw nna tsang 4 du hkra gaw jawng nta langai, ngam ai tsang 8 du hkra gaw langai di san san gap ai re. Sharin sara gaw n law ai hta jawng ma gawn hkang yak ai majaw jawng langai sha gaw gap taw ai re. Shangut la na matu yak hkak nga ai,” nga nna hpyen yen dabang lit nga salang tsun ai re.

Hpyen yen ladaw gaw na wa hpaji sharin ra ai jawng ma ni mung law re ai majaw Ma ni a hpaji lam hpe kanu kawa ni hku nna shakut ya nga ai hta hpaji jawng gaw gap na arung arai ni ra kadawn nga ai sha n-ga jawng kaw ap nawng na sharin sara ni mung n law ai lam dabang lit nga ai ni tsun ai re.

“Jawng gaw gap na arung arai ni mung Myitkyina de sha wa la ra ai. Kalang lang lam lapran kaw mung majan masa mung myit tsang ra, Lanam ladaw marang htu sawng yang lam hten na mung tsang ra re majaw Lanam ta ndu ai laman gaw gap shangut la na matu gaw hkyen taw nga,” nga nna mung tsun ai.

Ya aten Hpung Ngai Yang hpyen yen mung masha ni hpe KIO asuya kaw nna lu sha n-gu hpe shata shagu garum jaw ai re. Graum ningtum lam yawm sai re majaw Yi Sun galaw let, hka shi hkan Ja htu Ja shap nna galaw lu galaw sha let nga taw ai masa re hpe mung chye lu ai.

Hpung Ngai Yang hpyen yen dabang gaw Myitkyina Putao hkrun lam lapran kaw nga ai re hte Sumpyi Yang, Ntsi Yang, Wadat hkan na mung masha 1,500 daram shanu nga ai re. Hpung Ngai Yang hpyen yen dabang hta hpaji jawng hpe KG kaw nna Tsang ( du hkra hpaw nga sai re hte sharin sara/ saranum ni mung grai ra kadawn nga ai lam hpyen yen dabang lit nga salang tsun dan ai kaw na chye lu ai.

Shiga- Pyilan U