Hpung Ngai Yang Hpyen Yen Dabang Kaw Ma Kaji, Ma Hkum Kanu Ni A Matu Tsi Mawan Nnga Ai Majaw Ma Shangai Na Kanu Num Ni Kaw Na Hkawt Grai Yak Hkak Nga

Pajau Media

May 17, 2025

Jinghpaw mung Sumpra Bum muklum makau na Hpung Ngai Yang hpyen yen dabang kaw Ma kaji, Ma Hkum Kanu ni a matu tsi mawan n nga ai majaw Ma shangai na kanu num ni kaw na hkawt grai yak hkak nga ma ai lam chye lu ai.

“Shawng de mung Ma shangai ga ai raitim ya n dai kaw gaw tsi mawan n hkum ai hte kung jyang ai ma shangai ya na tsi sara num ni n nga ai majaw Ma shangai na nga yang Myitkyina de hkrai yu ra ai re,” nga nna Myitkyina de Ma wa shangai ai Kanu num langai tsun ai re.

Grau nna Sumpyi Yang mung chying masat lang da ai Mung masha ni gaw Putao ginra de hkawm sa na matu yak hkak ai. Myen hpyen dap jep joi shara ni hta Sumpyi Yang mung chying masat lang ai ni hpe ahkyak la na nga tsun jahkrit ai majaw n gwi sa ai nga nna Mung tsun ai.

“Anhte Sumpyi Yang masha ni gaw Putao de n mai lung ai. Lung Sha Yang hkan mung Covid aten manam n hkap la ai zawn kadai mung n hkap la sai, Sumpyi Yang maga de na masha ni hpe mu yang shana wa na hte n hkap la na matu Myen hpyen dap tsun da ai,” nga nna mung tsun da ai re.

Hkawm sa hkawm wa yak ai sha n-ga tsi mawan n hkum ai majaw Ma shangai na ni a matu makawp maga tsi ni htu hkam la na matu Myitkyina maga de sha yu nna wa htu ra ai re hte grau nna ja gumhpraw yak hkak ai ni a matu gaw grau yak hkak ai re.

Matut mahkai hkrun lam yak hkak ai majaw Makawp maga tsi htu na matu aten lai mat ai ni mung law law re. Hpung Ngai yang hpyen yen dabang kaw tsi mawan yak ai majaw shangai ngut sai Ma changai shata mi ram re ai ni asak si sum ai lam ni mung nga ai re hpe chye lu ai.

Shiga- Zau