Hpyen Dap ni gaw aten ntam rim hkawm nga ai lam

Pajau Media Channel

16 February 2024

Myen hpyen dap ni gaw aten ntam hkawm sa hkawm wa mung masha ni hpe rim hkawm nga ai re hte Feb 16 ya shana daw Hkying (4:00) Pm daram hta Shatapru Nau ra Pa kaw dung chyai nga ai Ramma marai (5) daram hpe rim woi mat ai lam chye lu ai.

Myen hpyen la ni gaw shinggan bu hpun palawng hpun da nna Nta jawn mawdaw ahpraw hte dung taw ai ramma ni hpe san jep woi mat ai masa re lam Nau ra pa makau mayan hkan shanu nga ai Mung masha ni lagu gayet da ai Vedio clip hta mu lu ai re.Nau ra pa gaw Mung masha ni law malawng hkawm chyai, dung chyai ai nna dingyang ngu na masha kamawng ai shara langai mi mung re.

Myen hpyen dap maga na masha ngu maram lu ai ni mung shinggan bu hpun palawng hkrai re majaw marai kade rim hkrum ai ngu hpe tup hkrak n lu chye ai raitim marai (5) daram ngu maram lu ai hte dai ramma ni hpe lata gyit nna rim woi mat ai re lam Myi chyaw mu mung masha ni tsun ai kaw na chye lu ai.

Myen hpyen dap maga na masha ni gaw shinggan bu hpun palawng hte dingyang gawan nga ai re majaw hkawm sa hkawm wa grai sadi maja ra ai, ramma ni hpe rim woi ngut ai hpang cycle hte masha marai (3) daram hpe bai wa jahkrat da ai hpe mu mada ai, ndai masa hku nga yang shinggan bu hpun palawng hte kyin yu grai dat da ai masa re lam Mung masha ni tsun maram nga ma ai re hpe mung chye lu ai.

Dai shara kaw dung taw ai ramma n kau gaw hprawng lawt mat ai re,Myen hpyen dap gaw aten ntam mung masha ni hpe rim ai lam ni galaw nga ai majaw ya aten Myitkyina ginra kata hkawm sa hkawm wa grai sadi maja ra nga ai masa re majaw ramma ni shinggan pru hkawm ai lam n galaw ga nga nna myit su salang ni tsun sadi jaw nga ma ai re hpe mung chye lu ai. Lai wa sai Feb (14) ya shani hta mung Myitkyina Dap kawng Lam maw kaba makau kaw nta shap rawng ai ramma marai (3) hpe mung shinggan bu hpun palawng hpun da ai masha ni kawn rim woi mat ai lam na chye lu ai.