Hpyen Koi Yen Mung Masha Ni Tinang Buga De Wa Nga Sai Raitim Myen Hpyen Dap A Nbungli Bawm Hpe Myit Tsang Nga Ai Lam

Pajau Media

October 8, 2025

Jinghpaw Mung kata gasat gala majan matut manoi laja nga ai lapran Mung masha n kau gaw buga de wa nga magang sai raitim Myen hpyen dap gaw gasat gala majan hte nseng ai Shanglawt uphkang ginra mare hkan Nbungli bawm wa jahkrat ai lam dingyang galaw ai majaw ya aten buga de wa nga sai Mung masha ni grai myit tsang nga ma ai re.

Myen hpyen dap gaw majan pa hta sum machyi ai lam nga shagu gasat gala n nga ai ginra hkan Nbungli bawm, Drone bawm wa jahkrat ai majaw ya aten Shanglawt uphkang ginra na Jawng n kau hpe mung gan pat da ai lam Buga de wa nga sai Mung masha langai tsun ai re.

“ Ya anhte ginra kaw Myen n nga sai ngu na buga de wa nga ai re, dingyang na myit dum ai gaw ntsa hpyen maja ra ai re, grau na yahte Sadung de Nbungli bawm wa jahkrat ai kaw na grau sai, dai majaw mare kaw hpaw da ai Shanglawt Asuya jawng ni hpe mung gan pat da ai masa re, Mare de n nan wa nga ai re majaw ahkyak ai buga hpung zuphpawng ni galaw na hkyen da tim n tsa hpyen tsang ra ai majaw gara hku rai na kun” nga nna buga de wa nga sai Mung masha langai tsun ai.

2011 majan kaw nna koi yen ai hpyen yen Mung masha law malawng gaw ya aten buga de wa nga magang nna bai gaw gap ai lam ni galaw nga sai hta Buga kaw Shanglawt Asuya Jawng ni hpaw da lu sai re.

Myen hpyen dap gaw lai wa sai August shata daram kaw nna Jinghpaw Mung kata tat sum kau ai shara ni hpe zing madu la lu hkra ngu ai masing hte Nbungli, Drone bawm ni hte madung jai lang htim gasat wa ai re hpe chye lu ai.

 Gasat gala majan n byin ai hkan du hkra Nbungli bawm gasat ai majaw mara kata Mung masha ni asak si sum law wa ai re. Myen hpyen dap gaw 2024 shaning laman tat sum kau ai Chihpwi, Pangwa, Sadung, Kanpaiti Miwa jarit mayan ginra ni hpe bai lu la hkra Waimaw Lamyang maga hku nna htu shadut htim gasat nga dingyang re hte Waimaw Lamyang ginra de October 8 ya jahapwt daw hkying 6 daram kaw nna laja lana gap gasat nga dingyang re hpe chye lu ai.

Shiga- Pyilan U