Hpyen Magam N Gun N Mai Tara Upade Shagrin Ai Hpang Myen Hpyen Dap Gaw Atik Anang Hpyen Lahkawn Ai Lam Matut Manoi Galaw Nga Ai Lam

Pajau Media

July 22, 2025

Myen hpyen dap gaw asak ram ai ramma ni hpe Gabaw amyu myu shadut nna atik anang hpyen lahkawn ai lam ni galaw nga ai re hte atik anang hpyen lahkawn hkrum ai ramma ni hku nna mung ahkaw ahkang lu yang lu ai hku Amyu sha rawt malan hpung ni maga de Shang wa na matu NUG asuya tsun shadut ai lam July 21 ya shani ndau wa ai re.

Myen hpyen dap gaw Myen mungdan madang hku nga tim hpyen masa hta grai sum machyi taw sai re majaw “ Myen mungdan hpyen magam Gun na hte seng ai Tara Upade” hpe shagrin nna atik anang masha rim lahkawn nna Hpyen Wunkat jaw ai lam re. Myen hpyen dap atik anang lahkawn hkrum ai ramma Mun (7) hkawt du nga sai lam mung tang madun da ai re.

Myen hpyen dap gaw Wunkat kalang yu yang yawm htum marai 4,000 du hkra tam shakut nga ai re lam chye lu ai. Dai majaw hpyen lahkawn ai lam hpe lam amyu myu hku galaw nga ai hta Maigan pru hkaw ahkang ni hkum pat ai lam, Mungdan kata hkrun lam hkawm ai lam hpe grai shagyip wa ai lam, Myo pru shang lam ni hkan shimlam grau shaja wa ai lam grau galaw wa ai re hpe mung chye lu ai.

Atik anang lahkawn la nna hpyen wunkat jaw ngut ai hpang Shawng lam hpyen man de Nanghpam lu sha ni atik anang jai lang shangun nna nna hpyen gasat shangun ai gaw ramma ni a prat hpe manu n shadan ai lam re. Dai majaw ahkaw ahkang lu ai yang lu ai hku ni nawn ai amyu sha lak nak lang rawt malan hpung ni maga n htang wa na matu NUG ausya tsun tsun n dau da ai kaw na chye lu ai.

Myen hpyen dap shagrin da sai Hpyen magam n gun n mai Tara Upade pru ai hpang mungdan kata hpyen lahkawn ai lam atik anang galaw nna Hpyen wunkat hpaw sharin ai gaw 2025 July shata du hkra rai yang masat yang (15) du nga sai lam mung chye lu ai.

Shiga- Pyilan U