Hpyen Majan Hpe Myit Tsang Ra Ai Hta Hka Hpyen Hpe Mung Hkrit Tsang Ra Nga Ai Lam

Pajau Media

August 8, 2025

Jinghpaw Mung Hpakant ginra hta gasat gala majan laja ai majaw Mung Masha ni Asak Shimlam a matu hprawng yen shakut nga ra ai lapran Hka hpyen hpe mung grai myit tsang ra ai masa hkrum katut nga ma ai re.

Gasat gala majan hta Myen hpyen dap gaw Nbungli htim gasat ai lam, Mung masha ni nga ai Mare Lawk maga de Lak nak kaba gap bang ai lam ni matut manoi galaw majaw Mung masha ni grai hkrit tsang nga ma ai re.

Gasat Gala a majaw hkrun lam yak nna Ginra kata Gunrai Manu ni rawt ai sha n-ga matut manoi htu nga ai Lamu Marang a majaw Mung masha jam jau ai hta jam jau jat nga ai re hpe mung chye lu ai.

Ndai laman marang matut manoi htu sawng ai majaw Hpakant Ginra Lawk n kau hkan hka shang ai lam, U Ru hka mayan shanu nga ai Mung masha ni mung lani hte lani kaba jat nga ai U Ru hka a majaw ya aten Hka hpyen hkrum katut na hpe myit tsang nga ma ai re.

Hpakant ginra masha langai tsun ai hta “ gasat gala majan lapran Hka mung bai kaba wa re yang gaw gara hpe she myit tsang ra na pyi n chye mat sai, n dai laman Marang Htu sawng ai majaw maning na zawn hka hpyen hkrum wa yang garum hpyi na shara Mung n nga, garum na matu mung n loi na sai” nga nna tsun ai re.

Marang ladu lai htu sawng ai majaw ya aten Maw Mau Layang kaw nna Maw Mau Hka kaba ai majaw hkyin gau ni hten za mat ai sha n-ga Hpakant Muklum kata hta mung marang ladu lai htu sawng ai majaw hkawm sa hkawm wa yak hkak nga ai lam chye lu ai.

Dai sha n-ga gau ngwi ngwi kaba wa ai U Ru Hka a majaw U Ru Hka mayan shanu nga ai Mung masha ni Hka hpyen hpe grai myit tsang nga ma ai re hpe mung chye lu ai.

Shiga – ND