Hpyen Yen Dabang Shagu Ngu Na Daram Hta Ya aten Tsi Mawan Hte Hpaji Sharin Jawng Ma Ni Lang Na Arung Arai Ra Kadawn Nga Ai Lam

Pajau Media

June 26. 2025

Jinghpaw mung kata nga Hpyen koi yen dabang n kau hta lanam ladaw Machyi makaw tuk kwi byin taw nga ai hte jawng lung ladaw re majaw Jawng ma ni lang na Jawng lang arung arai ni ra kadawn ai mayak ni hkrum sha ai lam chye lu ai.

Myitkyina Putao hkawm sa hkrun lapran na Hpung Ngai Yang hpyen koi yen dabang hta mung n dai laman Kan Mase, Tuk Kwi machyi masha law nga ai hte tsi mawan n hkum ai mayak ni mung hkrum nga ai lam dabang masha ni tsun ai kaw na chye lu ai.

Shang lawt uphkang ginra re majaw ra ai lam ni hpe Shang lawt asuya kaw nna yu nga ai raitim maga mi de n dep n hkap ai lam ni nga ai majaw ya aten na masa hta shinggan garum ningtum ni naw ra kadawn nga ma ai re hpe chye lu ai.

Dai sha n-ga Shang lawt Uphkang ginra rai nga ai Pa kahtawng hpyen koi yen dabang na Lawu Tsang Jawng hta mung laika sharin Jawng gawk shimlum lam ni n nga wa ai hte Jawng gawk kata dung lahkum hte Ma ni lang na arung arai ni hkyak hkyak ra kadawn nga ai lam chye lu ai.

Jinghpaw mung kata bai byin wa ai gasat gala majan hpang Hpyen koi yen mung masha sen 2 jan nga sai hte ya aten du hkra koi yen dingyang naw re. Hpyen koi yen masha ni law jat wa ai masa hta garum ningtum ni mung grai yawm wa ai majaw Mali hka mayan shanu nga ai ni gaw Mali hka hkingau hkan Ja loi li htu let sha dinghku mayak hpe hparan nga ma ai.

Raitim n dai laman mali hka kaba ai majaw shawoi na zawn Ja htu ai magam bungli mung n mai galaw ai sha n-ga kaga shang gumhpraw n nga ai majaw grau kashu kasha ni a hpaji lam hpe madi shadaw lu na matu yak hkak nga ma ai re lam chye lu ai.

Ya aten Waimaw Hka Nan mare masha ni koi yen nga ai Dinggum Yang hpyen yen camp hta mung n dai laman htu sawng ai n bung marang a majaw galup da ai Mu Ga tsam baw mat ai majaw hkyak hkyak garum ningtum ni ra kadawn nga ma ai lam chye lu ai.

Ya aten Hpyen Koi Yen Jawng ma ni hta Jawng lang arung arai hte lanam ladaw gup na jawng ni kaw na hkawt ra kadawn lam, lanam ladaw byin chye ai Kan mase, Tuk kwi machyi ai lam ni mung byin hkrum nga ai re majaw tsi mawan kaw na hkawt ra kadawn nga ma ai lam chye lu ai. Jinghpaw mung kata na Hpyen koi yen dabang shagu ngu na daram hta ya aten n dai zawn re ai mayak ni hkrum sha nga ma ai re hpe sagawn chye lu ai.

Shiga- Pyilan U