Hpyen Yen Ladaw Laning Mi Re Wa Sai Manmaw Hpyen Yen Ni Lam Magup Yak Hkak Lam Ni Law Wa

Pajau Media

November 12, 2025

Gasat gala majan laja dingyang rai nga ai Manmaw ginra hpyen koi yen mung masha ni gaw aten ladaw na wa ai hte maren garum ningtum lam dingyang n lu ai majaw grai yak hkak wa ai lam hpyen koi yen mung masha ni tsun ai.

Manmaw ginra hpe lai wa sai shaning december 4 ya kaw nna Manmaw Mali Hka makau mare kahtawng ni rai nga ai Mya Lay, Han Htet, Kaung Tung, Man Te, Mung Hkawng, Lan Ka, Mung Ding Pa, Zin Hkan hte mare kahtawng 30 jan kaw na Mung masha 10,000 jan gaw hprawng koi yen ra mat ai hte hpyen yen ladaw na wa ai hte maren malu masha lam ni grai yak wa ai re hpe chye lu ai.

Hpyen koi yen wa ai Ginra masha law malawng gaw hkum lawt daw sha koi yen wa ai rai nna tinang shim lum dum ai shara ni hkan koi yen nga ai majaw N ta masha law ai ni grau yak ai re lam chye lu ai.

Dai sha n-ga hpyen koi yen mung masha law ai hte malu masha n law sha ai mayak ni hkrum katut ai zawn hkam ja lam hte seng nna Tsi mawan n law ai mayak mung nga ai re hpe chye lu ai.

Hpyen koi yen ai gaw galoi aten du hkra rai na hpe n chye lu ai majaw malu masha hte Tsi mawan garum ningtum ni man man lu na matu ra sharawng nga ma ai re hpe mung chye lu ai.

Shiga - Htu Seng