Hpyen Yen Ni Bai Wa Nga Sai Ginra N Kau Hta Hpaji Jawng Ni Gan Pat Da Ai Lam

Pajau Media

September 4.2025

Jinghpaw Mung kata gasat gala majan grau bai laja wa ai gaw August htum maga kaw na rai sai hte myen hpyen dap gaw ganghkau hku htim gasat ai lam hpe madung galaw wa ai majaw hpyen yen ni bai wa nga sai shara hkan Jawng ni hpe gan pat da ai lam ginra masha ni kaw na Chye lu ai.

"N dai myitkyina Manmaw lam, Ga Ra Yang, Katsu Dabak hkan gaw Mung masha ni grai wa nga gaw gap hpang sai gaw re, n dai laman Waimaw ginra de majan grau bai laja wa nna n tsa hpyen gaw grai maja ra na tai ai, Ya hte shani pyi nbungli hpyen gawai wa ai, dai majaw Ga Ra Yang kaw na Asuya jawng, Myu Sha Jawng ni yawng gan pat da ai masa maram nna she bai hpaw na re" nga nna dai ginra masha tsun ai.

Waimaw de mung majan grai sawng wa ai hta nbungli, Drone, M.P.HK kaw nna mung laknak kaba lajan lana gap garum nga ai re majaw nbungli hpyen hpe hkrit tsang nna Hpaji Jawng ni hpe September praw 2 ya kaw nna pat sai re .

 Majan masa hta hkan nna bai hpaw sa wa na re lam chye lu ai. Dai ginra na Mung masha ni gaw hpyen yen aten ladaw shaning shi jan ning rai wa sai majaw buga de wa nga nna gaw gap nga magang sai re.

Raitim myen hpyen dap gaw Mung masha hte hpyen hpe ginhka ai lam n nga ai majaw majan hta sum machyi wa yang nbungli bawm hkrup mara jahkrat bun wa mai ai majaw grai myit tsang nga ma ai re.

Dai sha n ga ya aten majan laja nga ai Hpakant ginra hta mung Asuya hpaji jawng ni yawng hpe September 2 ya kaw nna pat da na matu myen hpyen dap tsun da ai lam chye lu ai.

Asuya Jawng ni hpe gan pat da ra ai masa hpe tup hkrak n lu tsun tim ya byin nga ai hpyen masa a majaw mai byin ai lam, jawng ni hpe pat ai hpang hpyen masa gara hku bai htu shadut wa na ngu ai hpe ginra masha ni myit tsang nga ma ai re.

Shiga - Pyilan U