Hten Taw Ai Hkawng Lang Hpu Mawdaw Lam Matut Na Grau Hten Wa Ai Majaw Ginra Masha Ni Lawan Bai Byeng Ya Na Matu Ra Sharawng Nga Ai Lam

Pajau Media

March 19, 2026

Putao ginwang kata kaw nga ai Putao-Hkawng Lang Hpu lam March praw hkan marang kaba htu sawng da ai majaw mawdaw lam ni grau hten wa sai re majaw ginra masha ni hkawm hkrun lam yak nga ai hpe chye lu ai.

Putao-Hkawng Lang Hpu lam gae lai wa sai shaning yinam ta hta marang kaba htu ai majaw lam hten sawng wa ai hpang lit nga ai ni kawn kaji kajaw byeng ya wa ai rai tim ndai March shata praw hkan marang bai htu ai majaw lam grau hten wa ai re.

Ginra masha ni gaw mi na lam hten ai a majaw hkawm sa lam hte rai htaw shalai na matu mayak law law nga wa ai zawn yahte hta mung bai hten wa ai majaw mayak nga ding yang rai nna lawan byeng ya na matu ginra masha ni ra sharawng nga ai hpe chye lu ai.

Ya na zawn mawdaw lam hten ai majaw Hkawng Lang Hpu ginra hta nga ai ginra masha ni gaw Putao muklum de hkawm sa na matu mayak nga ai sha n-ga gat dut sha ai bungli hta mung mayak nga wa ai ngu tsun ai re.

Putao– Hkawng Lang Hpu lam ni gaw ga lam re ai majaw shaning shagu na yinam ta du ten shagu ga gyi nna mawdaw lam hten ai mabyin shaning shagu nga ai ginra langai mung rai nga ai.

Shiga-Htu Seng