Indaw Ginra Kata Na Mung Masha (5,000) Hkawt Hpyen Koi Yen Ra Nga Ai Lam

Pajau Media

July 23, 2025

Indaw Ginra kata hkan Myen hpyen dap P.T.Ts pawng hpawm hpung ni gaw Mung masha ni hpe nga n mai hkra jep shatsang ai sha n-ga Myu sha lam garan ginhka ai zawn re nga n mai hkra galaw ai majaw dai ginra kata na Mung masha marai 5,000 hkawt gaw hkyak hkyak hprawng koi yen nga ai lam chye lu ai.

Dai ginra hta Sam Hkyeng P.T.Ts ni madung shamu shamawt nga ai re hte lai wa lai sa Mung masha ni hpe jep shatsang ai lam, hpyen lahkawn ai lam ni laja lana galaw nga ai re lam chye lu ai. Grau nna gaw Jinghpaw re nga ai ni hpe grau jep joi ai sha n-ga zingri ai madang du hkra galaw nna sat hkrum ai Mung masha mung law law rai sai lam na lu ai raitim shagrin la na matu yak nga ai masa re.

Indawgyi Hpakant lam hta shamu shamwat nga ai Sam Hkyeng P.T.Ts ni gaw Mung masha ni hpe jep joi ai hta makam masham hte seng ai Nawku Dawng Hkawn ni hpe du hkra je ashep kau ya ai lam, jinghpaw re nga ai ni hpe mara kata dung rawt galaw shagun ai lam, hput di di nna lata sharawt shangun ai lam, shanhte ra ai arung arai ni hpe mung zing la ai lam galaw ai re hpe mung chye lu ai .

Ya na zawn mara kata Mung masha ni hpe tara n lang ai hku jep shatsang ai gaw Myu garan ginhka ai maga de she du wa sai nga nna ginra masha ni tsun dinglun nga ma ai hpe mung chye lu ai. Mung masha ni hpe ladu lai jep zingri ai majaw Mung masha hkying lam gaw kawng lam hku koi yen ai ni nga ai zawn n kau gaw Hka lam hku nna koi yen hkawm nga ai re hpe mung chye lu ai.

Nam maling hkan tinang chye ai hku koi yen hkawm ai mung masha 2,000 hkawt nga ai hte 3,000 daram gaw Shanglawt uphkang ginra de koi yen na lam chye lu ai. Ya aten hkyak hkyak nga shara, malu masha, araung arai ni ra kadawn nga ai lam mung chye lu ai. Matut nna hpyen koiyen Mung masha ni a masa lam hte seng nna lawng lam hkum zup sagawn tang madun sa wa na re.

Hpakant hte Indaw ginra mayan hta ya aten majan laja nga ai re hte July 18 ya hta Myen hpyen dap N-gun kaba hte htim gasat wa ai majaw Indaw ginra kata shara lahkawng daram hpe rawt malan hpung maga na gan yen kau da ai hpang Sam Hkyeng P.T.Ts ni mare kata de shara la wa nga ai majaw ya na zawn Mung masha ni n mai nga nna koi yen ra ai madang de du mat ai re hpe mung chye lu ai.

Shiga- Pyilan U