Indaw Gyi Ginra Kata Myen Hpyen Dap Hpyen N-gun Jat Shamu Shamawt Ai Lam Galaw Wa Ai Majaw Gasat Gala Majan Byin WA Na Hpe Mung Masha Ni Myit Tsang Nga

Pajau Media Channel

28th May, 2024

Jinghpaw mung Mohnyin Indaw Gyi ginra mayan de May (27) ya shana daw kawn myen hpyen dap maga hpyen n-gun jat shamu shamawt ai lam laja lana galaw wa ai majaw gasat gala majan laja wa na hpe ginra masha ni myit tsang nga ma ai re lam chye lu ai.

“Mana de hkying (7) aten Hopin maga kaw na hpyen mawdaw (4) hte yu wa ai. Hpyen la n-gun 300 daram re, shawoi nga yang hpyen hpung htu shadut yang Mai Nawng Maga de sha htu ai re. N dai kalang gaw Indaw sinpraw hkran maga de htu shadut wa ai re. Mare kaw dai hpawt jau kaw na gasat poi byin na tsang ai majaw mung masha kasu kabrawng rai nga ai” nga nna ginra masha langai tsun ai re.

Myen hpyen dap n-gun (300) grup yin lawm ai hpung ni gaw Indaw Gyi sinpraw hkran maga na Sanun Kong maga kaw nna In Tar mare hpe lai let Chyaung Wa maga de hpyen n-gun jat htu shadut shamu shamawt nga ai lam ginra masha ni tsun ai kaw na chye lu ai.

Dai ginra mayan hta nga ai mung masha ni hpe lai wa sai April shata htum maga kaw nna KIA kawn tsun sadi jaw ai lam gaw nga ai re. Dai ginra mayan hta gasat gala majan byin wa mai ai re majaw mung masha ni yawng malu masha mari mahkawng da na matu tsun ai lam nga lai wa sai re nga nna mare kata salang ni tsun ai re.

KIA, PDF pawng hpawng hpung ni kawn Jinghpaw mung ginra kata lai wa sai March (7) ya kaw na htim gasat majan baw ai shata lahkawng daram na wa sai re hte myen hpyen dap a ahkyak ai Dap shara kaji kaba yawng (100) jan daram zing madu la lu sai rai nna ya aten du hkra gasat gala majan gaw laja nga dingyang re hpe mung chye lu ai.

Shiga - Kachin Pyi Tar