Jak Sau Mayak A Majaw 5kg Hta Jan Ai Arung Arai Hte Pe Mi hta Jan Ai Gunrai Sadek Ni Hte Sa Na Ahkang Nnga Ai Lam

Pajau Media

25 March 2026

Myen Mung hta sau mayak a majaw nkau Express mawdaw ni hte rai sa na nga yang 5kg hta njan ai rai ni hte Pe mi hta njan ai rai sadek ni sha sa na ahkang nga ai lam hpe online gat dut masha ni kawn chye lu ai.

Ya ten sau mayak a majaw rai ni hpe lagaw leng hte sha hkan sa hkawm ra nna 5kg hta jan ai rai ni htaw na matu mayak nga taw majaw rai ni hpe 5 kg sha htaw na ahkang nga ai hpe chye lu ai.

“Dai hpawt Ph. set wa ai, shanhte tsun yang 5kg hta jan ai rai ni nmai sa sai da. Hpa majaw ngu san yang sau mayak a majaw rai ni hpe lagaw leng hte sha hkan sa hkawm taw ra ai majaw grai li ai arai ni htaw yang asin npye ai da” nga online gat dut masha langai tsun ai.

Gat dut ai masha ni mung tinang sa ra na rai ni hpe 5kg hte pe mi ram sha nga ai rai sha sa taw majaw rai sa manu ni mung grau jaw ra taw na yak nga ai hpe tsun ai.

“Shawoi hkan nga yang sa na rai hpe yawng pawng bang na sa taw ai re, ya gaw 5kg hta nmai jan ai nga yang rai sa yang sa na arai mung law nna rai sa manu mung grau jaw ra taw” nga nna matut tsun ai.

Ya ten Myen mung hta sau manu ni lani hte lani rawt nga nna Jinghpaw Mung, Myitkyina muklum hta gaw 92 hpan sau liter mi hta 13000ks rai taw sai hpe chye lu ai.

Shiga-Hpring